შესაძლოა, მას საზოგადოებისთვის გაცნობა სულაც არ სჭირდება, მაგრამ შეუძლებელი იყო, ჩვენი რუბრიკის ფარფლებში თქვენთვის არ გვეამბო ძალიან დიდ შემოქმედზე, რომელიც ასე უვლის ქართულ მემკვიდრეობას და ჩვენი საგანძური ახალ თაობამდე დიდი სიყვარულითა და პროფესიობალიზმით უთქვამს.

წარმატებული, საერთაშორისო გამოფენების მონაწილე კალიგრაფი რუსთავიდან - დავით მაისურაძე. სწორედ ის იქნება ჩვენი დღევანდელი რუბრიკის გმირი.

ის გახლავთ 300-მდე ქართული კალიგრაფიული შრიფტის შემქმნელი, ტიპოგრაფი და რაც ძალიან მნიშვნელოვანია, კალიგრაფიის მასწავლებელი. დავითი პატარებს ასწავლის, როგორ გვესაუბრონ მოხაზულობებით, თავიანთი სათქმელი როგორ გვითხრან.

"მე ვარ დავით მაისურაძე, კალიგრაფი, ტიპოგრაფი და კალიგრაფიის მასწავლებელი.

2014 წელს დავამთავრე თბილისის სახელმწიფო უნივერსიტეტის იურიდიული ფაკულტეტი. 2016 წელს გავხდი სამართლის მაგისტრი კიოლნის უნივერსიტეტში (გერმანია). 2021 წლიდან კი ვარ სამართლის დოქტორანტი თბილისის სახელმწიფო უნივერსიტეტში.

2022 წლიდან ვარ საქართველოს კალიგრაფთა ასოციაციის თანადამფუძნებელი და დირექტორის მოადგილე. 2020 წელს კი მეგობრებთან ერთად დავაფუძნე გაერთიანება „რუსთაველი კალიგრაფები“ და ვარ მისი დირექტორი. რუსთავში სკოლა "მთაწმიდელში" ვასწავლი კალიგრაფიას 2010 წლიდან, რუსთავის სკოლა „ლაზარეში“ კი – 2011 წლიდან.

ვარ სამართალმცოდნე. 2016-2017 წლებში ვმუშაობდი გერმანიის საერთაშორისო თანამშრომლობის საზოგადოებაში (GIZ) საქართველოს სამოქალაქო კოდექსის კომენტარის სარედაქციო ჯგუფში. 2018 წლიდან კი ვარ თბილისის სახელმწიფო უნივერსიტეტის მეცნიერი თანამშრომელი და ლექტორი. კალიგრაფია და სამართალი ერთმანეთს ავსებს. რამდენად უცნაურიც არ უნდა იყოს, თანამედროვე მხედრული დამწერლობა სწორედ იურისტებმა, მდივანმწიგნობრებმა შექმნეს სამეფო საბუთების გადასაწერად.

კალიგრაფია ჩემთვის უპირველესად არის ტექსტის ინტერპრეტაცია. ყველა ტექსტი განსხვავებულ გრძნობებს აღძრავს მკითხველში. ჩემი, როგორც კალიგრაფის, ამოცანა კი არის ამ გრძნობების მონასმებში გამოხატვა და ტექსტის მთავარი სათქმელის გადმოცემა კალიგრაფიით. ყოველი ტექსტის განსხვავებული გრძნობით გადმოცემა სიახლის მუდმივ ძიებას ითხოვს, რაც ყველაზე ტრადიციული მახასიათებელია ქართული კალიგრაფიისა.

მიღებული მაქვს მონაწილეობა არაერთ საერთაშორისო გამოფენაში, მათ შორის კიოლნში, ფრანკფურტში, ბერლინში, ჰამბურგში (გერმანია), კაიროში, ალექსანდრიაში (ეგვიპტე), დუბაიში (არაბთა გაერთიანებული საამიროები), ბუქარესტში (რუმინეთი) და თბილისში (საქართველო).

2011 წლიდან ჩემი ოჯახი (ნუგზარ მაისურაძე, ლელა შიუკაშვილი, თეონა მაისურაძე და მე) აქტიურად ვუწყობთ ხელს რუსთავში და ქვემო ქართლში ახალგაზრდების დაინტერესებას კალიგრაფიით. 2011 წელს დავაარსეთ ქვემო ქართლის კალიგრაფიის კონკურსი, რომელიც ყოველწლიურად ტარდება როგორც სკოლის მოსწავლეებისთვის, ასევე ზრდასრული პირებისთვის. ქვემო ქართლის ეთნიკურად და რელიგიურად მრავალფეროვან საზოგადოებაში ჩვენს კონკურსს, შემეცნებითის გარდა, ახალგაზრდების დამეგობრებისა და დაახლოების მიზანიც აქვს. რუსთაველი და ქვემო ქართლელი კალიგრაფებისთვის ვაწყობთ პერიოდულ გამოფენებს. ქვემო ქართლში კალიგრაფიით დაინტერესება მზარდია. 2020 წელს შევქმენით გაერთიანება "რუსთაველი კალიგრაფები" ჩვენი მიზანია, რუსთავი და ქვემო ქართლი ქართული კალიგრაფიის კულტურის ნამდვილ ცენტრად ვაქციოთ.

კალიგრაფიის სწავლებას ქალაქ რუსთავში 2010 წლიდან ვხელმძღვანელობ. 2022 წლიდან კი თბილისშიც ვატარებ საავტორო კურსს საქართველოს კალიგრაფთა ასოციაციის სკოლაში. მაქვს სპეციალური კურსები ტიპოგრაფებისთვის, გრაფიკოსი დიზაინერებისთვის, ბავშვებისთვის, ზრდასრულებისთვის, ქართული კალიგრაფიით დაინტერესებული უცხოელებისთვის.

ჩემი შემოქმედების მნიშვნელოვანი ნაწილია შრიფტები. თანამედროვე შრიფტის დიზაინერები ისევე არიან კალიგრაფები, როგორიც ათი საუკუნის წინ სკრიპტორიუმში მოღვაწე ბერები. ორივე მუდმივად ასოთა ახალ, უფრო მარტივ, უფრო ლამაზ, უფრო მოსახერხებელ მოხაზულობებს ეძებს და ქმნის. მხოლოდ ხელსაწყოები შეიცვალა: ლერწმის კალამი გრაფიკულმა პროგრამებმა ჩაანაცვლა. შექმნილი მაქვს სამასამდე ქართული კალიგრაფიული შრიფტი, რომელთა დიდი ნაწილი ჩემი საიტიდანაც შეგიძლიათ ჩამოტვირთოთ".