პოლიციის თანამშრომელზე თავდასხმაში ეჭვმიტანილს, 1994 წელს დაბადებულ დ.ს.-ს აღმკვეთი ღონისძიების სახით პატიმრობა მიესაჯა. პროცესი რუსთავის საქალაქო სასამართლოში გაიმართა.

პროკურორმა ბრალდებულისთვის წინასწარი პატიმრობა, დ.ს.- ს წარსულიდან და გამოძიების ინტერესებიდან გამომდინარე მოითხოვა.

პროკურორ, ნუგზარ მახათაძის განცხადებით, პოლიციის თანამშრომელზე თავდასხმაში ეჭვმიტანილი პირი, წარსულში სამჯერ იყო ნასამართლები.

ბრალდებული დ.ს. საკუთარ პოზიციას სხდომაზე თავად იცავდა. მან აღმკვეთი ღონისძიების სახით თავდებობა მოითხოვა, თუმცა მოსამართლემ მისი მოთხოვნა არ დააკმაყოფილა.

ბრალდებულის ახლობლებმა „ინფო რუსთავთან“ კომენტარი არ გააკეთეს, თუმცა პირად საუბრებში აღნიშნიშნეს რომ დ.ს.-ს დანაშაული არ ჩაუდენია.

„ინფო რუსთავის“ ინფორმაციით პოლიციის თანამშრომელს ჭრილობა ბლაგვი საგნით სხვა პირმა მიაყენა, რომელიც ინციდენტის დროს დ.ს.-სთან ერთად იმყოფებოდა. ამ დროისთვის ის და კიდევ ერთი პირი მიმალვაში იმყოფებიან. ინფორმაციას შსს-ში არ ადასტურებენ.

პოლიციის თანამშრომელს თავს 9 იანვარს დაესხნენ. შემთხვევა მეგობრობის გამზირზე ღამის 4 საათზე მოხდა, არსებული ინფორმაციით სამართალდამცავებმა ნიღბებში მყოფი რამდენიმე პირი შენიშეს და გადამოწმების მიზნით მათთან გასაუბრება სცადეს. სწორედ ამ დროს ერთ-ერთმა პოლიციის თანამშრომელს თავის არეში ბლაგვი საგნით ჭრილობა მიაყენა.

საქმესთან დაკავშირებით სასამართლო სხდომა იანვარში გაიმართება. ნახეთ ვიდეო.