რუსთავის მე-12 პენიტენციურ დაწესებულებასთან გარდაცვლილი პროგრამისტის, თამარ ბაჩალიაშვილის მშობლებმა აქცია გამართეს.

ბაჩალიაშვილის მშობლებს ციხესთან „გრიგოლ ლილუაშვილო, ილაპარაკე!“, „ირაკლი ღარიბაშვილო, ილაპარაკე!“, - ამ შინაარსის ბანერები ჰქონდათ გაშლილი.

მათი მიმართვის ადრესატები მსჯავრდებული ყოფილი მაღალჩინოსნები - ირაკლი ღარიბაშვილი და გრიგოლ ლილუაშვილი იყვნენ.

როგორც გარდაცვლილის მშობლები აცხადებენ, სუს-ის ყოფილ უფროსს, გრიგოლ ლილუაშვილსა და თავდაცვის ყოფილ მინისტრს, ირაკლი ღარიბაშვილს თამარ ბაჩალიაშვილის გარდაცვალებასთან დაკავშირებით ინფორმაცია აქვთ, რისი გასაჯაროებისკენაც მოუწოდებენ.

"რამდენიმე კვირის წინ, ჩვენ ლილუაშვილთან და ღარიბაშვილთან გავაგზავნეთ წერილები, სადაც მოვთხოვეთ აღიარონ, თამარ ბაჩიაშვილის მკვლელობაში მონაწილეობა და დაასახელონ ის პიროვნებები, რომლებიც მათთან ერთად მოქმედებდნენ, რადგან თამარ ბაჩიაშვილის სისხლით ხელები ძალიან ბევრ ადამიანს აქვს დასვრილი. ჩვენ არ ვიცით, ადრესატამდე მივიდა თუ არა ჩვენი გზავნილი წერილი, ამიტომ მოვედით ციხესთან, რომ უშუალოდ მივმართოთ ღარიბაშვილს და ლილუაშვილს, რომ აღიარონ დანაშაული, თქვან ყველა გარემოება, რაც ამ საქმის ირგვლივ იციან და ერთგვარად გადაირჩინონ სული. კიდევ ერთხელ მივმართავ მათ, თქვენზე ძალიან ბევრი რამეა დამოკიდებული, საბოლოოდ თქვენ რომ არ დაგბრალდეთ მხოლოდ თამარ ბაჩალიაშვილის მკვლელობა, ჯობს აღიაროთ და დაასახელოთ დამკვეთები, შემსრულებლები“, - განაცხადა თეონა თამაზაშვილმა.