2019-01-04 18:11:18
თბილისის 71-ე ბაგა-ბაღის დირექტორის მოადგილე, დირექტორის ბრძანებით, დაკავებული თანამდებობიდან გათავისუფლდა.
თბილისის საბავშვო ბაგა-ბაღების სააგენტოს ინფორმაციით, აღნიშნული გადაწყვეტილება დირექტორმა გასული წლის 26 დეკემბერს ბაღში მომხდარი ინციდენტის გამო მიიღო, როდესაც წინასაახალწლო ზეიმზე ბაღში პიროტექნიკა აფეთქდა და ერთ-ერთმა ბავშვმა დაზიანებებიც მიიღო. ამავე ფაქტის გამო, აღნიშნული ჯგუფის აღმზრდელმა და თანაშემწემ დირექციას გათავისუფლების თხოვნით მიმართეს.
თბილისის N71-ე საჯარო ბაგა-ბაღში პიროტექნიკის ამოქმედების შემთხვევაზე მასალები შინაგან საქმეთა სამინისტროს გადაეგზავნა.
ბაგა-ბაღების მართვის სააგენტოს ინფორმაციით, ბაღის ადმინისტრაციისგან მიიღეს ინფორმაცია, რომ პიროტექნიკა ბაღში მშობელმა მიიტანა.
აფეთქების ამსახველი ვიდეოკადრები სოციალურ ქსელში გავრცელდა.
