რუსთავის მაღაზიებიდან რძის ამოღება, რომლის ნიმუშებშიც აფლატოქსინი აღმოჩნდა, თითქმის დასრულდა - ამის შესახებ "ინფო რუსთავს" სურსათის უვნებლობის ქვემო ქართლის რეგიონული სამმართველოს ხელმძღვანელმა, მირანგულა ლიპარტელიანმა განუცხადა.

ლიპარტელიანის თქმითვე, პროდუქცია უკვე გამოთხოვილია ყველა ქსელური სასურსათო მაღაზიიდან.

"დაწყებულია ამოღება, თვითონ კომპანიამ დაიწყო და ჩვენც ჩართული ვართ. მთელი ღამე მუშაობდა გუშინ ქალაქის სამსახური და პროდუქცია გამოთხოვილია. თითქმის ამოღებულია უკვე, აღარსად არ არის. თუ გამოჩნდა ვინმე ისეთი, ვინც უბნის მაღაზიაში ჩუმად დატოვება აღნიშნული პროდუქტი, თორემ დიდი ქსელებიდან ამოღებულია მთელი ქვეყნის მასშტაბით, მხოლოდ რუსთავსა და ქვემო ქართლში არა", - ნათქვამია განცხადებაში.

შეგახსენებთ, სურსათის ეროვნულმა სააგენტომ 3 აპრილს განცხადება გაავრცელა, რომლის მიხედვითაც, სოფლის ნობათის რძის ხუთ ნიმუშში აფლატოქსინი M1 (AFM1) დასაშვებზე მაღალი დოზით დაფიქსირდა. გამოკვლეული პროდუქტებიდან ერთი-ერთი საბავშვო რძე იყო.