რუსთავის რამდენიმე ქუჩას ახალი სახელი მიენიჭა. აღნიშნული გადაწყვეტილება ქალაქის საკრებულომ მიიღო.

კერძოდ, 9 ძმა ხერხეულიძის ქუჩის ნაწილს, სადაც მდებარეობს N2, N4 და N6 კორპუსები, მიენიჭა ვახტანგ გორგასლის III ხარისხის ორდენოსანის, ეროვნული გვარდიის მე-15 ბატალიონის მეთაურის, პოლკოვნიკ დავით გოლუბიანის სახელი.

ამიერიდან ქეთევან დედოფლის სახელობის იქნება გიორგი ჭყონდიდელის სახელობის ტერიტორიულ ერთეულში მდებარე გოგოლის ქუჩა.

მარის არხის პირველ დასახლებაში არსებულ უსახელო ქუჩას მიენიჭა საქართველოს სპორტის დამსახურებული მწვრთნელის და დამსახურებული ოსტატის, სლავა მეტრეველის სახელი.

თბილისი-წითელი ხიდის გზატკეცილის მიმდებარე ტერიტორიაზე არსებულ უსახელო ქუჩა კი რაგბის გამოჩენილი ქართველი მოღვაწის - ალექსანდრე ლობჟანიძის სახელობის იქნება.

საკითხი საკრებულოს სხდომაზე დეპუტატების ხმათა უმრავლესობით დამტკიცდა.