სურსათის ეროვნულმა სააგენტომ მიმდინარე წელს მთელი ქვეყნის მასშტაბით უალკოჰოლო სასმელების საწარმოებში 37 ინსპექტირება განახორციელა. სააგენტომ ლიმონათის 4 მწარმოებელს საწარმოო პროცესი შეუჩერა, რომელთაგან ერთ-ერთი რუსთავის საწარმო - შპს „ბარა-ბუ“-ა. აღნიშნული ბიზნესოპერატორების დაჯარიმება და მათთვის საწარმოო პროცესის შეჩერება ეტიკეტირების წესის დარღვევის და კრიტიკული შეუსაბამობების გამო მოხდა. „ინფო რუსთავი“ საწარმოს წარმომადგენელს გაესაუბრა, რომელმაც აღნიშნული ფაქტი დაადასტურა და განაცხადა, რომ მათთვის დაკისრებული ჯარიმა გადაიხადეს და გაითვალისწინეს სურსათის ეროვნული სააგენტოს რეკომენდაციები. საწარმოს წარმოების პროცესი გარკვეული დროით შეჩერებული ჰქონდა, თუმცა ამჟამად, შპს „ბარა-ბუ“ ფუნქციონირებას განაგრძობს. ასევე, არაკრიტიკული შეუსაბამობების გამო დაჯარიმდა 9 ბიზნესოპერატორი.