შარტავას გამზირზე დაწყებული მშენებლობის საქმე სასამართლოში მოსახლეობამ მოიგო. საუბარია რამდენიმე წლის წინ შარტავას №19 ნომერში ერთ-ერთი ბიზნესმენის მიერ დაწყებულ სამშენებლო სამუშაოებზე, რომელსაც  მოსახლეობის პროტესტი მოჰყვა.

2015 წელს ბიზნესმენ ლიანა შუბითიძეს რუსთავის მერიამ მშენებლობის დაწყების ნებართვა მისცა, ამის შემედგ რუსთავის მერიას განცხადებით "ბინათმესაკუთრეთა ამხანაგობამ" მიმართა, რის საფუძველზეც ქალაქის მერიამ მშენებლობის ნებართვის გაცემაზე მიღებული გადაწყვეტილება გააუქმა და ბათილად ცნო. ამის შემდეგ დავა სასამართლოში გაგრძელდა.

ლიანა შუბითიძემ მერიის მიღებული გადაწყვეტილება გაასაჩივრა, სასამართლომ დააკმაყოფილა სარჩელი და ბიზნესმენს მშენებლობის ნებართვა აღუდგინა. ამას მოჰყვა მერიისა და მოსახლეობის მხრიდან საქალაქო სასამართლოს გადაწყვეტილების სააპელაციო სასამართლოში გასაჩივრება, შედეგად ძალაში დარჩა მშენებლობის ნებართვის გაუქმების გადაწყვეტილება. ამის შემდეგ შუბითიძემ უზენაეს სასამართლოს მიმართა, სადაც საქმე არ განიხილეს. დღეის მდგომარებით კი ლიანა შუბითიძეს მშენებლობის ნებართვა არ აქვს.

შარტავას ქუჩაზე დაწყებულმა სამშენებლო სამუშაოებმა მოსახლეობის პროტესტი არაერთხელ გამოიწვია. კომერციული ობიექტის მშენებლობა კი სასამართლო დავის პერიოდში დღემდე შეჩერებული იყო.

ბიზნესმენი ლიანა შუბითიძე "ინფო რუსთავთან" საუბარში აცხადებს, რომ ადვოკატთან კონსულტაციის შემდეგ გადაწყვეტს, როგორ წარმართავს თავის საქმიანობას.

ავტორი: ირმა კურტანიძე