"სტუდენტური ტარიფის" მოთხოვნით რუსთაველმა სტუდენტებმა აქცია გამართეს. მერიის შენობის წინ შეკრებილი "ერთიანი ნაციონალური მოძრაობის" წევრები და სტუდენტები რუსთავის მერისგან მათი ინიციატივის განხილვასა და სტუდენტებისთვის რუსთავი-თბილისის მიმართულებით მგზავრობის საფასურის შემცირებას ითხოვდნენ. ნახეთ ვიდეო.

"ჩვენი მთავარი მოთხოვნაა, რომ ადგილობრივმა თვითმმართველობამ მიიღოს "სტუდენტური ტარიფი", რაც ნიშნავს განახევრებულ ტარიფს, 75 თეთრის ოდენობით. ჩვენ უკვე სამი წელია მივმართავთ ადგილობრივ თვითმართველობას, წერილობითი განცხადებებიც გვქონდა, აქციებიც გვქონდა, მაგრამ დამოკიდებულება იგივე დარჩა. განხილვის თემადაც არ ჰქონიათ ჩვენი პროექტი მათ. ჩვენ მივმართეთ პრემიერ-მინისტრსაც, ვიცე-პრემიერსაც, მათგანაც იგივე დამოკიდებულება იყო , პასუხიც კი არ გამოგვიგზავნეს, ამიტომ გადავწყვიტეთ , რომ აქციები ისევ გავმართოთ და როგორმე ვაიძულოთ ხელისუფლება, რომ მოგვაქციონ ყურადღება რუსთაველ სტუდენტებს და მიიღონ ის ტარიფი, რომელსაც ჩვენ ვთავაზობთ" - განაცხადა რუსთავის სტუდენტთა ასოციაციის წევრმა თამარ მეტრეველმა.

აქციის მონაწილეებთან შეხვედრის სურვილი მერის მოადგილეებმა, გოჩა ლორიამ და დავით კეკელიძემ, გამოთქვეს. მერიის საკონფერენციო დარბაზში შეხვედრა კამათისა და ხმაურის ფონზე მიმდინარეობდა. სტუდენტებსა და მერის მოადგილეებს  შორის დიალოგი ვერ შედგა და აქციის მონაწილეებმა დარბაზი პროტესტის ნიშნად დატოვეს.

"მოდიან და შემოდიან რუპორით სათათბირო ოთახში, ლაპარაკს არ გაცლიან, პარტიული დავალება შეასრულეს ამ ბავშვებმა, არ ვიცი რას გადაუხდიან, როგორ გადაუხდიან , რადგან აქ ტყუილად არ მოდიან და ტყუილად არავინ არაფერს არ აკეთებს მაგათი მხრიდან, ეს ამხელა შუღლის, ამხელა ბოროტების თესვა უნდა დამთავრდეს ბოლოსდაბოლოს, ამათ მშობლებს მივმართავ, ცოტა თვალები აუხილონ, ცოტა რაღაც სიყვარულისკენ შემოატრიალონ ეს ბავშვები" - განაცხადა გოჩა ლორიამ.

ლორიას ინფორმაციით, მერია სოციალურად დაუცველ სტუდენტებს მგზავრობის საფასურის გადახდაში ყოველთვიურად ეხმარება, 4000 სტუდენტის მგზავრობისთვის თანხის გამოყოფის საშუალება კი ბიუჯეტს არ აქვს - "ბოლო ორი წელიწადია უკვე რუსთავის სოციალურად დაუცველი ოჯახებიდან სტუდენტები სარგებლობენ  მგზავრობის 50-ლარიანი შეღავათით ყოველთვიურად. ასევე სარგებლობენ ომის ვეტერანების შვილები, მარჩენალ დაკარგულები, ამას ემატება ისიც, რომ ჩვენ სწავლის საფასურსაც ვუნაზღაურებთ სოცუალურად დაუცველებს 800 ლარის ოდენობით, თუ წარჩინებული სტუდენტები არიან ვაფინანსებთ ასევე მათ, მაგრამ ამათ ამის გაგონება არ უნდათ, ესენი დიალოგზე კი არა პროვოკაციაზე იყვნენ წამოსულები. რეალური გეგმები უნდა დავსახოთ და არა ის ფანტაზიები, რომ 4000 სტუდენტია და 4000-ივეს გზის ფული გადავუხადოთ, არ აქვს ახლა ბიუჯეტს  ამის საშუალება, თორემ რაზეა ლაპარაკი. რუსთავიდან თბილისში მგზავრობა 1,50-1,80 ღირს ხომ გასაგებია, რა ქნას მაშინ იმ ხაშურელმა, ყოველდღე რომ უნდა იაროს და 6 ლარი ღირს მგზავრობა? სოციალურად დაუცველი თუ არის ვაკეთებთ რაღაც შეღავათს და ვისაც შემოსავალი აქვს, თვითონ გადაწყვეტს სად ისწავლოს. ყველა შესაძლებლობის მიხედვით განსაზღვრავს სად და როგორ დაამთავროს, პლუს ამას რამდენი მოსწავლეც ამთავრებს სკოლას იმდენი სტუდენტი ხდება, გვაქვს აგერ გადამზადების ცენტრი, სპეციალობას ისწავლის და არ არის აუცილებელი ის დიპლომი ჰქონდეს, თუ იქ ვერ მიდის აგერ არის და ისწავლოს აქ, სპეციალობას დაეუფლება და მერე შემოსავალი თუ გაუჩნდება ისწავლოს მერე უმაღლეს სასწავლებელში, თავსი შემოსავალიც ექნება. " - აღნიშნა გოჩა ლორიამ.

სტუდენტები მგზავრობის შემცირებული ტარიფის მოთხოვნით აქციების გამართვას აანონსებენ და ქალაქის მერთან, ირაკლი ტაბაღუასთან, შეხვედრას ითხოვენ.

ავტორი: ირმა კურტანიძე