2018-01-29 20:27:33
რუსთავის მერმა, ირაკლი ტაბაღუამ პოლონეთში სამუშაო ვიზიტის შედეგები შეაჯამა. რუსთავის დელეგაცია პოლონეთის სამ ქალაქში: ლოძში, ლუბლინსა და სტალოვა ვოლაში იმყოფებოდა. რუსთავის მერი და ინოვაციების ჰაბის თანამშრომლები ამ ქალაქების განვითარების ისტორიას, ეკონომიკურ მდგომარეობას, ხედვებს, მოქალაქეთა ქალაქის განვითარებაში ჩართულობის მექანიზმებს და ინოვაციურ იდეებს გაეცნენ.
რუსთავის მერიის ინოვაციების ჰაბის კოორდინატორი, რეზო ბარბაქაძე აცხადებს: „გვქონდა შეხვედრები თვითმმართველობასთან, დავიწყეთ ფიქრი გარკვეულ ერთობლივ იდეებზე და საქმიანობებზე და ვიზიტის შედეგად შევქმენით მცირე სამოქმედო გეგმა, რომლის განხორციელებასაც დავიწყებთ და რომელიც შეეხება ქალაქის ცხოვრების ყველა ასპექტს.“
ირაკლი ტაბაღუას განცხადებით: „ლოძში, ლუბლინსა და სტალოვა ვოლაში ვიზიტების ერთობლივი სინთეზი ძალიან კარგი მაგალითი შეიძლება იყოს რუსთავისთვის, მოქალაქეთა ჩართულობისთვის, აქტიურობისთვის, რომელიც მიზნად ისახავს ქალაქის სტრატეგიის გრძელვადიანი გეგმის შემუშავებას.“ მერის განცხადებით, თვითმმართველობა აპირებს მოქალაქეთა ჩართულობის გაზრდას და რუსთავში არსებული რესურსის მაქსიმალურად გამოყენებას.
