პოლონეთში, სამუშაო ვიზიტის ფარგლებში, რუსთავის მერი ირაკლი ტაბაღუა ბიზნეს სექტორისა და თვითმმართველობის წარმომადგენლებთან ერთად, ლიუბლინის ვიცე მერს, არტურ შიმშეკს შეხვდა. შეხვედრაზე საუბარი სხვადასხვა სფეროში ორმხრივი თანამშრომლობის საკითხებსა და სამომავლო პერსპექტივებს შეეხო. რუსთავის მუნიციპალიტეტის დელეგაცია პოლონეთში 21 იანვარს გაემგზავრა და ოფიციალურ შეხვედრებს ლოძში, სტალოვა ვილასა და ლიუბლინში მართავს. რუსთავის თვითმმართველობისა და ბიზნეს სექტორის წარმომადგენლები ეცნობიან პოლონეთში არსებულ ინოვაციურ სერვისებს, მათი დანერგვის სპეციფიკას, ასევე, განხორციელებულ და მიმდინარე რევიტალიზაციის პროცესს, რაც 90-იანი წლების ეკონომიკური კოლაფსის შემდეგ, ყოფილი ინდუსტრიული ქალაქების განვითარებას ითვალისწინებს.

რუსთავის მერია ჩართულია პროექტში - „სამთავრობო სერვისლაბის და UNDP-ის პარტნიორობის ექსპერიმენტული მოდელი მმართველობაში განვითარების ახალი სფეროების აღმოჩენისთვის“. პროექტს გაეროს განვითარების პროგრამა (UNDP) და საქართველოს იუსტიციის სამინისტროს სერვისების განვითარების სააგენტო ახორციელებენ. რუსთავის დელეგაციის ვიზიტი პოლონეთში 26 იანვარს დასრულდება.

ინფორმაციას ვიზიტის შესახებ რუსთავის მერია ავრცელებს.