თბილისის ბაღების მართვის სააგენტოს განცხადებით, 152-ე ბაღის პედაგოგს ტუბერკულოზის ნიშნები დაუფიქსირდა.მათივე თქმით, პრევენციის მიზნით, იმ ჯგუფის აღსაზრდელები, რომელთაც პედაგოგთან უშუალო შეხება ჰქონდათ, სპეციალურ შემოწმებას გაივლიან.

თბილისის ერთ-ერთ საბავშვო ბაღში პედაგოგისთვის ტუბერკულოზის დიაგნოზთან დაკავშირებით, განცხადება გააკეთა მერმა, კახა კალაძემ და აღნიშნა, რომ ბაღის პედაგოგებს მკაცრად ევალებათ ყოველწლიურად გაიარონ სამედიცინო შემოწმება.მერის თქმით, ყველა მოსწავლემ და მასწავლებელმა, ვისაც შეხება ჰქონდა კონკრეტულ ადამიანთან, რომელსაც დაუდგინდა ​ტუბერკულოზი,უნდა  გაიარონ შემოწმება. რაც შეეხება შემოწმების ხარჯს, მას ბაღების სააგენტო თავის თავზე აიღებს.

"ინფო რუსთავი" დაუკავშირდა რუსთავის ბაღების გაერთიანების ხელმძღვანელს, ეკა ხუციშვილს. მისი თქმით, აღნიშნულ საკითხთან დაკავშირებით არსებობს შინაგანაწესი, რომლის მიხედვითაც, ყველა პედაგოგი და ის პირი, რომელსაც ბავშვთან კონტაქტი აქვს, ვალდებულია, წარმოადგინოს შესაბამისი სამედიცინო ცნობა.