გიორგი ჭანტურიას ადვოკატი, ანა კეკენაძე აცხადებს, რომ მისი დაცვის ქვეშ მყოფზე 16 იანვრიდან დღემდე სამართალდამცველების მხრიდან ზეწოლა ხორციელდება და ამასთანავე, საზოგადოებაში დეზინფორმაცია ვრცელდება. „ჩვენ მივმართეთ ორგანოებს, რომლებიც პასუხისმგებელნი არიან, დარღვევების შემთხვევაში მოახდინონ რეაგირება. ასევე ჩვენ მოვითხოვთ, სამხარეო პოლიციის განყოფილებიდან ამოღებულ იქნას ვიდეოჩანაწერები, რომლებიც ასახავს იმ ფაქტს, თუ როგორ მიმდინარეობდა გიორგი ჭანტურიაზე ზეწოლა.“ ანა კეკენაძის განცხადებით, ჯერჯერობით, ის ვერ დაასახელებს კონკრეტულ პირებს, რომლებიც, მისი ინფორმაციით, ზემოქმედებას ახდენდნენ მისი დაცვის ქვეშ მყოფზე, თუმცა კეკენაძის ხელთ არსებული ინფორმაციით, აღნიშნულ ზემოქმედებაში მონაწილეობდნენ სამხარეო პოლიციის განყოფილების თანამშრომლები და შინაგან საქმეთა მინისტრის პირველი მოადგილე, კახა საბანაძე. გიორგი ჭანტურიას ადვოკატს ეჭვი აქვს იმასთან დაკავშირებითაც, რომ, შესაძლოა, მოწმეებს და სამართალდამცველებს შორის არსებობს გარკვეული გარიგებები: „მოწმეები გამოიკითხნენ, თუმცა როდესაც გავრცელდა ინფორმაცია, რომ თითქოს, გიორგი ჭანტურიას წვლილი მიუძღვის მკვლელობის საქმეში, გავრცელდა იგივე მოწმეების სრულიად განსხვავებული ჩვენებები, სადაც ისინი პირდაპირ თუ ირიბად მიუთითებდნენ გიორგი ჭანტურიაზე.“ „ვთხოვ გამოძიებას, იყვნენ ფრთხილად, ასევე იმ ადამიანებს, რომლებიც არღვევენ უდანაშაულობის პრეზუმფციას, რადგან ეს არის დანაშაული, რისთვის პასუხისგება მოუწევთ.“ - აცხადებს კეკენაძე.

გიორგი ჭანტურიაზე ზეწოლასთან დაკავშირებულ ინფორმაციაზე შსს-მ ოფიციალური განცხადება დღეს გაავრცელა: „როგორც საზოგადოებისთვის ცნობილია, გენერალ სამსონ ქუთათელაძის მკვლელობის ფაქტზე მიმდინარე გამოძიების ფარგლებში, 2018 წლის 17 იანვარს საქართველოს სისხლის სამართლის კოდექსის 236-ე მუხლით, საბრძოლო მასალის უკანონო შეძენა-შენახვის ფაქტზე, დაკავებულ იქნა გიორგი ჭანტურია, რომელიც მოგვიანებით გათავისუფლდა. გამოძიების პროცესში მოპოვებული მტკიცებულებებით, სხვა ფაქტებთან ერთად, გამოიკვეთა, რომ გიორგი ჭანტურია იყო ის პირი, რომელმაც სამსონ ქუთათელაძე მკვლელობამდე ნახა. შესაბამისად, გამოკითხვის დროს, ჭანტურიას სამართალდამცველებმა დაუსვეს ლოგიკური კითხვები მკვლელობასთან მის შესაძლო კავშირთან დაკავშირებით.

აღნიშნული არის დანაშაულის გამოძიების სტანდარტული და ფართოდ აპრობირებული ტაქტიკა. შესაბამისად, ყოველგვარი განცხადებები ზეწოლის შესახებ სამართლებრივ საფუძველს მოკლებულია და წარმოადგენს გიორგი ჭანტურიას ადვოკატის ტაქტიკას არასწორი საზოგადოებრივი აზრის ფორმირებისთვის.

მოვუწოდებთ ყველა მხარეს, დაელოდონ გამოძიების შედეგებს და თავი შეიკავონ სამართლებრივ საფუძველს მოკლებული განცხადებებისგან.

შინაგან საქმეთა სამინისტრო განაგრძობს გენერალ სამსონ ქუთათელაძის მკვლელობის საქმის გამოძიებას. მიმდინარეობს ინტენსიური საგამოძიებო მოქმედებები.“ - ნათქვამია განცხადებაში.