სოსო ქუთათელაძის მკვლელობის გამოძიების ფარგლებში დაკავებული და შემდეგ გათავისუფლებული გიორგი ჭანტურიას საცხოვრებელ სახლში განმეორებითი ჩხრეკა ჩატარდება. ყაზბეგის ქუჩაზე, გიორგი ჭანტურიას სახლთან სამართალდამცველები არიან მობილიზებული. ადგილზე იმყოფება ჭანტურიას ადვოკატი, ანა კეკენაძეც. გიორგი ჭანტურიამ ჟურნალისტებთან ვრცელი კომენტარი გააკეთა. მისთვის გაუგებარია განმეორებითი ჩხრეკის ჩატარების მიზეზი, თუმცა ის ამას მტკიცებულებების ფალსიფიკაციას უკავშირებს. ჭანტურიამ ზეწოლაზეც ისაუბრა, რომელიც, მისი თქმით, სამართალდამცველების მხრიდან მასზე განხორციელდა:"ზეწოლა მიმდინარეობდა იმასთან დაკავშირებით, რომ ეს დანაშაული უნდა ამეღო ჩემს თავზე." ის უარყოფს ინფორმაციას იმის თაობაზე, რომ მას სოსო ქუთათელაძესთან რაიმე უთანხმოება ჰქონდა. ჭანტურიას ვარაუდით, სწორედ იმ ფაქტმა, რომ ის მკვლელობის დღეს ბაზარში იმყოფებოდა და ესაუბრა კიდეც მოკლულ სოსო ქუთათელაძეს, გაუჩინა ეჭვი სამართალდამცავ ორგანოებს.

ყაზბეგის ქუჩაზე მდებარე საცხოვრებელ სახლთან მობილიზებული იყო სასწრაფო-სამედიცინო დახმარების ეკიპაჟიც. გიორგი ჭანტურიას მამა, ზურაბ ჭანტურია შეუძლოდ გახდა, რის შემდეგაც სასწრაფო-სამედიცინო დახმარების ეკიპაჟმა კლინიკაში გადაიყვანა. ნახეთ ვიდეო