რუსთავის მერიის გადაწყვეტილებით XI მიკრო-რაიონის მიმდებარე ტერიტორიაზე სოციალური საცხოვრისი აშენდება. კორპუსის მშენებლობაზე მილიონი ლარი დაიხარჯება, პროექტი ქვემო ქართლის გუბერნიაში უკვე მოიწონეს და დასაფინანსებლად ინფრასტრუქტურის სამინისტროს გადაუგზავნეს. ვინ იცხოვრებს, რა კრიტერიუმებით შეირჩევა ოჯახები და რამდენ მოსახლეზე იქნება გათვლილი საცხოვრისი, მთავარ კითხვებზე საბოლოო პასუხები ჯერ არ არის, თუმცა "ინფო რუსთავი"-სთვის ცნობილია რომ კორპუსში 52 ოჯახი იცხოვრებს, მთავარი კრიტერიუმი სოციალური მდგომარეობის გარდა რუსთავში ცხოვრების ხანგრძლივი პერიოდი იქნება. ჩვენი ინფორმაციით ოჯახები ჯერ შერჩეული არ არის, ამ დროისთვის კრიტერიუმის დეტალების დაზუსტება მიმდინარეობს.