გუბერნატორის ადმინისტრაციაში  საკონსტიტუციო საბჭოს შეხვედრა გაიმართა, რომელსაც შვიდივე მუნიციპალიტეტის მერი და საკრებულოს თავმჯდომარე წარმომადგენლები ესწრებოდნენ. შეხვედრაზე 2018 წლის განსახორციელებელი პროექტები განიხილეს და ბიუჯეტიდან დაფინანსების წესებზე იმსჯელეს.

რუსთავში განსახორციელებელ პროექტებზე საუბრისას ქალაქის მერმა სოციალური საცხოვრისის პროექტზე გაამახვილა ყურადღება.

„ძირითადი აქცენტი საგზაო ინფრასტრუქტურაზეა გაკეთებული, იგეგმება რამდენიმე ცენტრალური ქუჩის სრული რეაბილიტაცია, მათ შორის, მშვიდობისა და გაგარინის ქუჩის პროექტი განიხილება. მოსახლეობის მოთხოვნების გათვალისწინებით ყურადღება დაეთმობა შიდა ეზოების კეთილმოწყობას. აღსანიშნავია ისიც, რომ დაგეგმილი და მოწონებულია სოციალური საცხოვრისის მშენებლობა, რომელსაც თანადაფინანსებით ცენტრალური და ადგილობრივი ბოუჯეტიდან დაახლოებით მილიონ ლარამდე დაეთმობა. ეს პროექტი საბჭოს მიერ მოწონებულია და 2018 ველოდებით მის განხორციელებას.“-განაცხადა ირაკლი ტაბაღუამ.

მუნიციპალური განვითარებისთვის რეგიონის მასშტაბით დაგეგმილ და მოწონებულ პროექტებზე საუბრისას ქვემო ქართლის  გუბერნატორმა, გრიგოლ ნემსაძემ აღნიშნა, რომ 2018 წელს უფრო მასშტაბური პროექტები ეგეგმება, ვიდრე 2017 წელს განხორციელდა.

„2017 წელი წარმატებული წელი იყო, რადგან მუნიციპალიტეტისთვის ბევრი საინტერესო პროექტი განხორციელდა. დღევანდელ შეხვედრაზე დავსახეთ სამომავლო გეგმები და მოვიწონეთ 2018 წელს განსახორციელებელი პროექტები - გზის, ინფრასტრუქტურისა და წყლის სისტემის მოწესრიგება. რაც შეეხება ბიუჯეტს, 2017 წელს 58 მილიონი იყო გამოყოფილი და 400-მდე პროექტს დაეთმო, სავარაუდოდ, 2018 წლისთვისაც ამავე თანხით ვიწყებთ მუშაობას. თუმცა, როგორც წესი, წლის შუა პერიოდისთვის ეკონომიებისა და დამატებითი რესურსების შედეგად ბიუჯეტი მატულობს.“

ღონისძიებაზე მოწონებული მუნიციპალიტეტის განვითარების პროექტები  საქართველოს რეგიონული განვითარებისა და ინფრასტრუქტურის სამინისტროს გადაეგზავნება. საბოლოოდ შერჩეულ პროექტებს მუნუციპალური განვითარების ფონდი დააფინანსებს.