რუსთავის მერი, ირაკლი ტაბაღუა რუსთავის სტუდენტთა ასოციაციის თავმჯდომარეს, მიშიკო კანკიას შეხვდა. შეხვედრის მიზანი სტუდენტური ტარიფის და ამ საკითხთან დაკავშირებული პრობლემების განხილვა იყო. ადგილობრივი თვითმმართველობის ინიციატივით, სპეციალური ტრანსპორტის გამოყოფა იგეგმება, რომელიც სტუდენტებს შეღავათიან ფასში მოემსახურება. ირაკლი ტაბაღუას განცხადებით - "პროექტი და პროგრამა მორგებული უნდა იყოს ახალგაზრდებზე და მათი აზრი მნიშვნელოვანია ჩვენთვის. მნიშვნელოვანია, ასევე, მათთან თანამშრომლობა და სწორი გზების დანახვა. მე მზად ვარ, ნებისმიერ დროს ვისაუბრო ამ თემაზე ახალგაზრდებთან, სტუდენტებთან და მივიდეთ კონკრეტულ ნაბიჯამდე, რაც ამ პროექტის განვითარებას შეუწყობს ხელს." რუსთავის სტუდენტთა ასოციაციის თავმჯდომარის განცხადებით, რუსთაველი სტუდენტები გააგრძელებენ ამ საკითხზე მუშაობას, მოთხოვნების განსაზღვრას და ისინი მზად არიან მხარი დაუჭირონ თვითმმართველობის მხრიდან ახალი ნაბიჯის გადადგმას თუმცა იმ შემთხვევაში თუ მერია აღნიშნული საკითხის მოგვარებაზე არ იზრუნებს, ისინი მზად არიან სტუდენტური ტარიფის მოთხოვნით აქციები განაახლონ.

ავტორი: ანა ჯვარიძე