საწარმო-მაღაზია "კამა" momxmarebeli.ge-ს მიერ გავრცელებულ ინფორმაციას, რომელიც გაყინულ ხინკალში ჰიგიენური ინდიკატორის ნორმის გადაჭარბებას ეხება,  ეხმაურება და აცხადებს, რომ მათ პროდუქციაში ჰიგიენური და სხვა სახის დარღვევები არ არსებობს და momxmarebeli.ge-ს მიერ გავრცელებული ინფორმაცია კომპანიის იმიჯის შელახვას ისახავს მიზნად.

"კომპანიაში გეგმიურად ყოველთვიურად ხდება პროდუქციის შემოწმება გ.ნათაძის სახელობის კვლევითი ლაბორატორიის მიერ,რომელიც აკრედიტირებულია და ამავდროულად სერთიფიცირებული. აღნიშნულ ორგანიზაციასთან გვაქვს გრძელვადიანი ხელშეკრულება და ის ზედამხედველობას და კონსულტაციას უწევს ჩვენს კომპანიას. გარდა ამისა სურსათის უვნებლობის სამსახურის მიერაც ხდება ჩვენი კომპანიის შემოწმება ,თუმცა მნიშვნელოვანი შენიშვნები არ ყოფილა,ხოლო სარეკომენდაციო ტიპის შენიშვნები ყოველთვის აღმოფხვრილია." - აღნიშნულია შპს "კამას განცხადებაში.

კომპანიის ადვოკატი, რეზო მოდებაძე, "ინფო რუსთავთან" საუბარში აღნიშნავს, რომ გაურკვეველია, როგორ მოხდა საწარმოში შეძენილი პროდუქციის ტრანსპორტირება, რომელიც შემდგომში ლაბორატორიაში შემოწმდა, ადვოკატი ეჭქვეშ აყენებს "კამას" პროდუქციისგან მომხმარებლის მოწამვლის ფაქტსაც.
"ოჯახის წევრები რომ მოეწამლა არ არსებობს ექიმის დასკვნა, არ არსებობს კლინიკის დასკვნა, არ არსებობს სასწრაფოს დასკვნა.
ხინკალი არ იქნა დალუქული მათ მიერ და ჩვენთან შეთანხმების გარეშე შემოწმდა. რაც არის ტექნოლოგიური დარღვევა, ვინაიდან არ ვართ ინფორმირებულები თუ რა პირობებში იქნა გადატანილი პროდუქცია შესაბამის ლაბორატორიულ ცენტრში." 

კომპანიის ხელმძღვანელმა, momxmarebeli.ge-ს მიერ ივლისში გავრცელებული ლაბორატორიული დასკვნის გამოქვეყნების შემდეგ,  იმავე  გ.ნათაძის სახელობის ლაბორატორიაში შეამოწმა იგივე დასახელების პროდუქცია, რომლის მიკრობიოლოგიური დასკვნის თანახმად, გაყინულ ხინკალში ჰიგიენური ინდიკატორების ნორმების გადაჭარბება არ დაფიქსირებულა.

შპს "კამა-ში" აცხადებენ, რომ აღნიშნული ინფორმაციის გავრცელება მიზანმიმართული და პროვოკაციაულია და არაა გამორიცხული მის უკან კონკურენტი კომპანია ან კონკრეტული პირი იდგეს. კომპანია აღნიშნულ საკითხთან დაკავშირებით სასამართლო დავას აპირებს.