"მე-3 ჯერ გადავრჩი გაგუდვას და ახლაც ამ პრობლემის წინაშე ვარ",- ამის შესახებ საინფორმაციო სააგენტო "ინფო რუსთავს" ერთ-ერთმა რუსთაველმა ქალმა განუცხადა, რომლის თქმითაც ქალაქში ბინების გაქირავების დროს გამქირავებლების ნაწილი გაზის დანადგარების უსაფრთხოებას ყურადღებას არ აქცევენ.

"დაახლოებით 3 წელია ქირით ვართ მე და ჩემი მეუღლე და უკვე 3 ბინა გამოვიცვალეთ და გეტყვით რა საშინელი პირობებია ე.წ. გაზის კალონკებთან და გაზქურებთან დაკავშირებით ნაქირავებ ბინებში. მე-3 ჯერ უკვე გადავრჩი გაგუდვას და ახლაც ამ პრობლემის წინაშე ვარ.

გამქირავებლები არ აქცევენ ყურადღება ტექნიკას, მოგეხსენებათ ბინების ფასი თან როგორ არის გაზრდილი. ახლა რომ გამოვიძახო შესამოწმებლად დააჯარიმებენ და ღირსიც იქნებიან გამქირავებლები. გთხოვთ ეს მესიჯი გაასაჯაროოთ, რომ გამქირავებლებმა ოფიციალურად უსაფრთხო ტექნიკით გააქირაონ ბინა. მე გადავრჩი მცირეწლოვან ბავშვთან ერთად კინაღამ გავიპარე ძილში.  და არამარტო გამქირავებლებს ყველა ოჯახში უნდა იყოს ეს ძალიან საშიში თემა აღმოფხვრილი",- აცხადებს ქალი, რომელმაც ანონიმად დარჩენა არჩია.

საინფორმაციო სააგენტო "ინფო რუსთავი" საკითხთან დაკავშირებით კომპანია "სოკარ გაზ ჯორჯიას" დაუკავშირდა, სადაც განაცხადეს, რომ მთელი წლის განმავლობაში ეტაპობრივად შემოწმებას ატარებენ, რომლის ფარგლებშიც კონტროლდება არის თუ არა გაზის დანადგარები სწორად დამონტაჟებული. თუკი გაზის დანადგარი არასწორად არის დამონტაჟებული ხდება მისი დალუქვა, რის შემდეგაც მეპატრონემ დანადგარის დემონტაჟი უნდა განახორციელოს.