თბილისის ახალი შემოვლითი გზის პროექტი არის მოკვლევა-ადრეული პროექტირების ეტაპზე. ამის შესახებ "ბიზნესპრესნიუსისთვის" გახდა ცნობილი.

შესაბამისად, ზუსტი პროექტი, როგორი იქნება, ჯერ არ ხმაურდება და სწორედ ამ პროცესის დასრულების შემდეგ გვეცოდინება. თუმცა, სავარაუდო მარშრუტი, თუ სად გაივლის ახალი შემოვლითი გზა, გაავრცელა კომპანიამ, რომელთანაც ამ გზის პროექტირებასთან დაკავშირებით ხელშეკრულება გაფორმდა.

კერძოდ, იტალიური კომპანიის (ერთობლივი საწარმო) ANAS International Enterprise S.p.A. & Gestione Progetti Ingegneria srl. & IRD Engineering srl ვებ-გვერდზე გავრცელებული ინფორმაციის თანახმად, თბილისის ახალი შემოვლითი გზა დაიწყება ჟინვალიდან, ამავე სამუშაოების ფარგლებში მცხეთაში, ჯვრის მონასტერთან გაიჭრება ახალი გვირაბი, შემდეგ მაგისტრალი გვერდს აუვლის თბილისის ზღვას, გაივლის დიდი ლილოს მიმდებარედ და დაუკავშირდება რუსთავს.

შეგახსენებთ, რომ ნატახტარი-ჟინვალისა და თბილისის ახალი შემოვლითი გზის (ნატახტარი-რუსთავი) მშენებლობა ჯერ კიდევ 2016 წელს დაანონსდა. იმ პერიოდშივე დაიწყო აღნიშნული მაგისტრალების პროექტირებაზე მუშაობა. პროექტი, ნატახტრიდან რუსთავამდე და ნატახტრიდან ჟინვალამდე სრულიად ახალი, ალტერნატიული ჩქაროსნული გზის მშენებლობას ითვალისწინებს. იმავე პერიოდში გზების პროექტირების მიზნით, ხელშეკრულება გაფორმდა იტალიურ კომპანიასთან (ერთობლივი საწარმო) ANAS International Enterprise S.p.A. & Gestione Progetti Ingegneria srl. & IRD Engineering srl.