თურქეთში, ქურდობის ბრალდებით დაკავებული 5 ფეხბურთელს შორის 2 რუსთავის საფეხბურთო კლუბის ყოფილი მოთამაშეა.

"ინფო რუსთავის" ინფორმაციით, დაკავებულები გურამ.მ და დათა.ს რუსთავის საფეხბურთო კლუბში გასულ წელს თამაშობდნენ, ამ ეტაპზე კი საფეხბურთო კლუბ "ცხინვალის" მოთამაშეები არიან.

შეგახსენებთ, რომ თურქეთში, ქურდობის ბრალდებით საფეხბურთო კლუბ "ცხინვალის" 5 მოთამაშეა დაკავებული.

აღნიშნულთან დაკავშირებით საქართველოს ფეხბურთის ფედერაცია განცხადებას ავრცელებს. "ინფო რუსთავი" განცხადებას უცვლელად გთავაზობთ. 

გვსურს, გამოვეხმაუროთ ქართულ და თურქულ მედიაში გავრცელებულ ინფორმაციას, რომლის თანახმად, ქალაქ ანტალიის სავაჭრო ცენტრში ქურდობისათვის დააკავეს ანტალიაში სპორტულ შეკრებაზე მყოფი ქართული საფეხბურთო კლუბის - ცხინვალის ფეხბურთელები.

საქართველოს ფეხბურთის ფედერაცია - ფეხბურთის მმართველი ორგანო საქართველოში, რომლის ერთერთი მთავარი ფუნქციაა, არ დაუშვას ქართული ფეხბურთის იმიჯის შელახვა, როგორც ქვეყნის შიგნით, ისე საერთაშორისო მასშტაბით, მოუწოდებს საფეხბურთო კლუბ ცხინვალს, აღნიშნული ინფორმაციის დადასტურების შემთხვევაში, მისი უფლებამოსილების ფარგლებში, მიიღოს შესაბამისი ზომები კანონდამრღვევ პირებთან დაკავშირებით.

საქართველოს ფეხბურთის ფედერაცია გმობს ყველა იმ ქმედებას, რომელიც ჩადენილია კანონსაწინააღმდეგოდ და ნეგატიურად აისახება არამხოლოდ ქართული ფეხბურთის, არამედ ქვეყნის რეპუტაციაზე.