სკოლის გამოსაშვები გამოცდების მოდელში ცვლილებაა.

კერძოდ, შეფასებისა და გამოცდების ეროვნული ცენტრის ინფორმაციით, ტესტირების დასრულებისას მოსწავლე ეკრანზე დაინახავს არა ქულას, არამედ შეტყობინებას იმის შესახებ, გადალახა თუ არა მინიმალური კომპეტენციის ზღვარი, ანუ მიიღო მინიმალურ 5,5 ქულაზე მეტი თუ ნაკლები.
ზღვარის გადასალახად კი მოსწავლემ დაახლოებით 15 მარტივ კითხვას უნდა უპასუხოს სწორად.

წლების განმავლობაში საატესტატო გამოდებში ყველაზე მაღალ შედეგებს ქვეყნის მასშტაბით რუსთავის #4 საჯარო სკოლა აჩვენებდა, ამიტომ "ინფო რუსთავი" ცვლილებასთან დაკავშირებით  მე-4 საჯარო სკოლის დირექტორს მამუკა ხამხაძეს დაუკავშირდა.

ხამხაძე აღნიშნულ ცვლილებაში როგორც დადებით ასევე უარყოფით მხარეებს ხედავს. მისი თქმით,  ამ სიახლით, სკოლის დამთავრება მარტივდება.

"ნებისმიერი ტიპის ცვლილებას აქვს თავისი დადებითი და უარყოფითი მხარეები,  დადებითი მხარეები არის ის, რომ ამ ცვლილებით გამოსაშვები გამოცდები და ზოგადად სკოლის  დამთავრება რაღაც ფორმით მარტივდება, გარდა ამისა, მოსწავლეთა იმ კატეგორიას, რომელსაც პრობლემები აქვს სწავლაში უფრო უადვილდება გამოცდის ჩაბარება, რადგან იხსნება დაბალი ნიშნის მიღებით გამოწვეული  უხერხულობის განცდა, უმცირდება სტრესი და ა.შ, ამასთან იმ სკოლებს, რომლებსაც აქვთ დაბალი მიღწევები საატესტატო გამოცდებზე აღარ ექნებათ გამოცდების შედეგების გასაჯაროების  შიში და უხერხულობის მომენტი.", - აღნიშნა მამუკა ხამხაძემ.

მე-4 საჯარო სკოლის დირექტორის თქმით, ცვლილება მეორე მხრივ მოსწავლეებში სწავლის მოტივაციის დაკარგვას გამოიწვევს - "რაც შეეხება უარყოფით მხარეებს, სკოლისთვის და მოსწავლისთვის იკარგება გარე შეფასების მნიშვნელობა, კერძოდ, მოსწავლე სკოლას დაამთავრებს ისე, რომ ვერ გაიგებს მისი მიღწევის დონეს ვერცერთ საგანში, რაც მას გარკვეულწილად უმცირებს სასწავლო მოტივაციას, გარდა ამისა სკოლა და თვითონ სისტემა კარგავს იმის შესაძლებლობას გაზომოს მოსწავლის შედეგები ანუ როგორ დაამთავრეს მოსწავლეებმა სკოლა და რომელ საგანში რა მიღწევა ან პრობლემა იყო.
გარდა ამისა, საატესტატო გამოცდების პროგრამა ეროვნული გამოცდების პროგრამას რიგ საგნებში არის აცდენილი, ამიტომ მოსწავლეს ნაკლები მოტივაცია ექნება კარგად ისწავლოს სკოლაში დამამთავრებელ კლასებში, რადგან სკოლაში ნასწავლი მასალა ნაკლებად გამოადგება ან სულაც არ გამოადგება ეროვნულ გამოცდებზე, რადგან იქ სრულიად სხვა რამეს აბარებს. და ბოლოს ამ ცვლილებით, გარკვეულწილად დამამთავრებელი კლასების, განსაკუთრებით მე-12 კლასის მნიშვნელობა მოსწავლის განათლების საქმეში კნინდება და უფრო იზრდება ეროვნული გამოცდების როლი, რადგან მე-11 და მე-12 კლასის მოსწავლე უფრო მეტად ორიენტირებული ხდება ეროვნულ გამოცდებზე. ყველა ბავშვი თვლის, რომ მან იმდენი მაინც იცის, რომ ის როგორმე ბარიერს გადალახავს იმ 15 კითხვით, ასე რომ მათი სწავლის მოტივაცია მეთორმეტე კლასში, ვფიქრობ გარკვეულწილად კლებულობს.", - განაცხადა მამუკა ხამხაძემ.

რაც შეეხება საატესტატო გამოცდებში წლების განმავლობაში მეოთხე სკოლის უმაღლეს მაჩვენებლებს, დირექტორი აღნიშნავს - "ჩვენთვის, როგორც მეოთხე სკოლისათვის ეს გამოცდები 2010 წლიდან ტარდება და ჩვენ ამ ხნის განმავლობაში ყოველთვის გვქონდა პირველი მაჩვენებელი ქვეყანაში და ეს გარკვეულწილად ჩვენთვის საპატიო და საამაყო მომენტია, რომ უახლესი განათლების ისტორიაში ჩვენ ვრჩებით ამ საატესტატო გამოცდებზე ფლაგმანად. "

გამოსაშვები გამოცდები წელსაც ორ ეტაპად, მე-11 და მე-12 კლასებში ჩატარდება. მე-11 კლასის მოსწავლეები სასწავლო წლის ბოლოს იმ საგნებს აბარებენ, რომელთა სწავლაც დაასრულეს (ფიზიკა, ქიმია, ბიოლოგია, გეოგრაფია). დარჩენილ 4 საგანში კი ტესტირებას (მათემატიკა, ქართული ენა და ლიტერატურა, უცხოური ენა, ისტორია) მოსწავლეები სკოლის დამთავრებისას გადიან.

ავტორი: ირმა კურტანიძე