2018 წლის 29 იანვრის მდგომარეობით საქართველოში წითელას 102 შემთხვევა დაფიქსირდა.
დაავადებათა კონტროლის ცენტრის ინფორმაციით,102 შემთხვევიდან ყველაზე მეტი 86 შემთხვევა აჭარაში დაფიქსირდა (52 ბათუმში, 14 ქობულეთში, 14 ხელვაჩაურში, 2 ხულოში, 3 წედაში, 1 შუახევში), 5-5 შემთხვევა დაფიქსირდა თბილისსა და ქვემო ქართლში, 4 შემთხვევა სამეგრელოში, 2 კი მცხეთა მთიანეთში.
როგორც "ინფო რუსთავს" რუსთავის ბავშვთა საავადმყოფოს დირექტორმა ნატო თოფურიამ განუცხადა, ბავშვთა საავადმყოფოში წითელათი ჯერ არავის მიუმართავს.
რაც შეეხება რუსთავის ცენტრალურ საავადმყოფოს, დაწესებულებაში აცხადებენ, რომ რუსთავში წითელას შემთხვევა მოზრდილებშიც არ დაფიქსირებულა.
დაავადებათა კონტროლის ცენტრის ინფორმაციით, წითელას შემთხვევათა უმეტესობა 20 წლის ზევით ასაკობრივ ჯგუფსა და 1 წლამდე ასაკის ბავშვებში ვლინდება.
“20-დან 40 წლის მოსახლეობას აქვს დაბალი იმუნური ფენა და სწორედ ეს იწვევს ეპიდემიას. გარდა ამისა, აღსანიშნავია , რომ პრევენციაში განსაკუთრებული როლი აქვთ იმ ქალბატონებს, რომლებიც რეპროდუქციულ ასაკში არიან და გეგმავენ ოჯახის შექმნასა და შვილის გაჩენას. ჩემი მოწოდებაა, რომ გადაიმოწმონ თავისი სტატუსი. თუ არ არიან ან არ ახსოვთ, გაიკეთეს თუ არა ვაქცინაცია, არ არის პრობლემა, მივიდნენ და დამატებითი აცრა გაიკეთონ, ეს იქნება დაცვა, რომ დაორსულებისა და შვილის გაჩენის შემდეგ ბავშვი 0-დან 1 წლამდე ,სანამ წითელაზე აცრა მოუწევს, ამ ვირუსით არ დაავადდება” – განაცხადა ამირან გამყრელიძემ.
ამირან გამყრელიძის ინფორმაციით, ვაქცინაცია უნდა ჩაუტარდეს ყველა იმ პირს ვისაც ინფიცირებულ ადამიანთან აქვს კონტაქტი , ასევე ყველა იმ ბავშვსა და ყველა 20-დან 40 წლამდე ადამიანს, ვისაც ვაქცინაცია ჯერ არ ჩაუტარებია.
წითელას ტიპური შემთხვევა ტემპერატურის მომატებით იწყება, სიმპტომებიდან დაახლოებით 2-3 დღის შემდეგ პირის ღრუში შეიძლება გაჩნდეს წვრილი, თეთრი გამონაყარი , 5-6 დღის შემდეგ კი ავადმყოფს სხეულზე ჩნდება გამონაყარი. თუმცა, რაც უფრო ასაკოვანია დაავადებული, მით უფრო რთულია სიმპტომების გადატანა.
როგორც საზოგადოებრივი ჯანმრთელობის ეროვნული ცენტრში აცხადებენ, სიმპტომების გამოვლენისას აუცილებელი არაა ავადმყოფის ჰოსპიტალიზაცია, თუმცა, მნიშვნელოვანია, რომ პაციენტმა დროულად მიმართოს ოჯახის ექიმს და მხოლოდ მისი დასკვნის საფუძველზე იმოქმედოს. მისივე თქმით, წითელას საწინააღმდეგო გეგმიური იმუნიზაციისას გამოყენებულ ვაქცინას არ აქვს უკუჩვენება.
ავტორი: ირმა კურტანიძე