უკრაინაში, ქალაქ ხარკოვში, კრივის საერთაშორისო ტურნირი გაიმართა სადაც საქართველოს ეროვნული ნაკრები იღებდა მონაწილეობას, აღსანიშნავია რომ ნაკრების 2 წევრი ლაშა გურული და ნიკოლოზ ბეგაძე რუსთაველები არიან. აღნიშნულ ტურნირზე ასპარეზობდა ოთხი სახელმწიფოს: მაროკოს სამეფოს, ბელორუსიის, საქართველოს და უკრაინის წარმომადგენლები, ტურნირში სულ 50 მოკრივე იღებდა მონაწილეობას. შეჯიბრება საერთო ჯამში 10 წონით კატეგორიაში გაიმართა, საქართველომ კი 8 კატეგორიაში 10 მოკრივე წარადგინა, ესენი არიან: 49 კგ – სახილ ალახვერდოვი (თბილისი), 52 კგ – ონისე სოსელია (ქუთაისი), 56 კგ – არტიუშ გომციანი (ახალქალაქი), 60 კგ – ოთარ ნავერიანი (მარნეული), 64 კგ – ლაშა გურული (რუსთავი), 69 კგ – ესკერხან მადიევი (თბილისი), გიორგი ხარაბაძე (ქუთაისი), 91 კგ – ნიკოლოზ ბეგაძე (რუსთავი), არტიომ იორდანიანი (ახალქალაქი), +91 კგ – გიორგი ჭიღლაძე (საჩხერე), სამწვრთნელო შტაბი: ლაშა დუნდუა, ბეჟან ჭიჭინავა.

რუსთაველი მოკრივე ლაშა გურული მეოთხედ ფინალში უკრაინელს შეხვდა, ნახევარ ფინალში ბელორუსს, ხოლო ფინალში კვლავ უკრაინელთან მოუწია ორთაბრძოლა. ლაშამ დამაჯერებლად იასპარეზა და გაიმარჯვა, სამშობლოში გამარჯვებული ბრუნდება ნიკა ბეგაძეც. ნიკა მეოთხედ და ნახევარ ფინალში უკრაინელებს შეხვდა, ხოლო ფინალში ბელორუსი დაამარცხა.

მოკრივეები ევროპის ჩემპიონატისთვის ემზადებიან, რომელიც რუმინეთში 24 მარტიდან 3 აპრილის ჩათვილით გაიმართება.