1 მარტიდან თბილისში მოძრავი მიკროავტობუსები 14 ქუჩაზე გაჩერებას მხოლოდ ავტობუსების გაჩერებაზე შეძლებენ. აღნიშნული რეგულაცია რუსთავიდან თბილისის მიმართულებით (და პირიქით) მოძრავ მიკროავტობუსებსაც შეეხება. თბილისის ტრანსპორტის სამსახურის ხელმძღვანელმა მამუკა მუმლაძემ "ინფო რუსთავთან" საუბარში აღნიშნა რომ - "ქუჩებზე უკვე დაიწყო ყვითელი ფერის დატანა, იმისთვის, რომ მხოლოდ ავტობუსებმა და მიკროავტობუსებმა გააჩერონ. წესის დაღვევის შემთხვევაში ჩვენ გვყავს მონიტორინგის სამსახური, რომელიც მოძღოლებს 10 ლარით დაჯარიმებს." კომპანია "ინტერტრანსში" აცხადებენ რომ, გაითვალისწინებენ ახალ რეგულაციებს და შესაბამისად დაემორჩილებიან წესს.

14 ქუჩა, სადაც მიკროავტობუსებს მგზავრებისთვის მხოლოდ ავტობუსების გაჩერებებზე მოუწევთ გააჩერონ არის: მერაბ კოსტავას ქუჩა, ვაჟა-ფშაველას გამზირი, შოთა რუსთაველის გამზირი, პეტრე მელიქიშვილის ქუჩა, ალექსანდრე ყაზბეგის გამზირი, ვახტანგ გორგასლის ქუჩა, დავით აღმაშენებლის ხეივანი, დავით აღმაშენებლის გამზირი, ილია ჭავჭავაძის გამზირი, ჟიული შარტავას ქუჩა, პეკინის ქუჩა, მარშალ გელოვანის გამზირი, ჯორჯ ბუშის ქუჩა, კახეთის გზატკეცილი.

აღნიშნულ ქუჩებზე კომპანია "ინტერტრანსის" 3 მარშრუტი გადაადგილდება, ესენია: სპორტის სასახლის, მაღლივი კორპუსის და დიდუბის მიმართულებით მოძრავი მიკროავტობუსები. შეგახსენებთ, რუსთავი-თბილისის ხაზზე 300-მდე სამარშუტო მიკროავტობუსი მოძრაობს.

აღსანიშნავია რომ ახალი წესები ჯერ-ჯერობით არ ეხება იმ კომპანიებს რომლებსაც მგზავრები მინივენით გადაჰყავთ.