„პატრიოტთა ალიანსის“ რუსთავის ორგანიზაციის ხელმძღვანელი, დავით კაპანაძე თანამდებობიდან გადააყენეს. „გუშინ ქუჩიდან შევიტყვე, რომ მე გადაყენებული ვარ.“ კაპანაძის განცხადებით, მისთვის მიზეზი ჯერ არავის განუმარტავს. მისივე თქმით, ის დაუკავშირდა აღმასრულებელ დირექტორს, პარლამენტის წევრებს, თუმცა მისი ინფორმაციით, მათ არაფერი იცოდნენ ამის შესახებ. დავით კაპანაძის ვარაუდით, მისი პარტიიდან გაშვება „პატრიოტთა ალიანსის“ ლიდერის, ირმა ინაშვილის გადაწყვეტილება იყო. კაპანაძის განცხადებით, მისთვის მიუღებელია არა გადაწყვეტილება, არამედ მისთვის გადაწყვეტილების შეტყობინების ფორმა. დეპუტატის განცხადებით, მას არ ჰქონია გარიგება სხვა პარტიებთან. მისივე თქმით, „ევროპული საქართველოს“ წევრ მამუკა აბულაძესთან საუბარი იყო ფრაქციის შექმნაზე, თუმცა მან ამის შესახე პარტიის ლიდერს შეატყობინა და ამის შემდეგ ფრაქციის შექმნაზე საუბარი აღარ ყოფილა.

დავით კაპანაძე პარტიის წევრი აღარ იქნება, თუმცა საკრებულოში დამოუკიდებელ დეპუტატად მუშაობას განაგრძობს. მის თანამდებობას „პატრიოტთა ალიანსის“ წევრი თორნიკე არევაძე დაიკავებს. არევაძის განცხადებით, მის თავმჯდომარედ დანიშვნაზე გასული წლის დეკემბრიდან იყო საუბარი, თუმცა მისთვის მოულოდნელი აღმოჩდა დავით კაპანაძის პარტიიდან გარიცხვა.