რუსთაველი მოკრივის, ლაშა გურულის დებიუტი პროფესიონალურ კრივში მშობლიურ ქალაქში, რუსთავში 15 მარტს შედგება.

საინფორმაციო სააგენტო "ინფო რუსთავი" ესაუბრა ლაშა გურულს, რომელმაც გვითხრა, რომ რუსთავში სადებიუტო ბრძოლის ჩატარება მისი სურვილი იყო.

დებიუტამდე ერთ თვეზე ნაკლებია დარჩენილი და ლაშა ახლა აქტიურ მომზადებას დუბაიში გადის.

"მომზადებას გავდივარ ჩემს ახალ გუნდთან ერთად დუბაიში. კონტრაქტს ხელი მოვაწერე დუბაის ორგანიზაციასთან. რუსთავში ბრძოლა მე შევთავაზე. მენეჯერთან ერთად ვფიქრობდი, რომ პროფესიონალურ კრივში დებიუტი მიგვეძღვნა რუსთავისთვისა და ქართველი ხალხისთვის, ამიტომაც ჩვენი ინიციატივით გადავწყვიტეთ, რომ დებიუტი რუსთავში ჩაგვეტარებინა. დუბაისა და საქართველოს ერთობლივი ივენთი გამოდის.

რა თქმა უნდა, ჩემთვის სასიამოვნო იქნება და მინდა, კარგი საღამო ვაჩუქო ჩვენს ქალაქსა და ქვეყანას",- განგვიცხადა ლაშა გურულმა.

ლაშა გურულის მეტოქე პირველ ბრძოლაში განელი ბერნარდ აბეი იქნება, რომელსაც პროფესიონალურ კრივში 5 ბრძოლა აქვს გამართული და 5-ივე მისი გამარჯვებით დასრულდა.

15 მარტს რუსთავის სპორტის სასახლეში დაგეგმილ საღამოზე 12-მდე ბრძოლაა ჩანიშნული, თუმცა საღამოს მთავარი ბრძოლა სწორედ ლაშა გურულისა და ბერნარდ აბეის დაპირისპირება იქნება.