რუსთავში, ბოლო რამდენიმე წელია, ბინის გირავნობის ფასები მზარდია.

ფასები როგორც ადგილმდებარეობის, ასევე საცხოვრებელი პირობებიდან გამომდინარე, მცირედით იცვლება, თუმცა ეს ძირითად სურათს ნამდვილად არ ცვლის.

უკვე რამდენიმე წელია, 15 000$-ად სახლის დაგირავებას რუსთავში ნამდვილად ვეღარ შეძლებთ, რაც არცთუისე შორეულ წარსულში, გირავნობისთვის ადეკვატურ თანხად ითვლებოდა.

ბინის დაგირავების სეგმენტში უძრავი ქონების სააგენტოები აქტიურად მუშაობენ. როგორც სფეროს წარმომადგენლები ამბობენ, ამ ეტაპზე ქალაქში ბინის დასაგირავებლად, მინიმუმ 17-18 000$-ია საჭირო.

საინფორმაციო სააგენტო "ინფო რუსთავს" უძრავი ქონების აგენტმა, ალექსანდრე ცერცვაძემ განუცხადა, რომ ამ ფასშიც კი, საცხოვრებელი ფართის დაგირავების შემთხვევები, უკვე რუსთავში ძალიან იშვიათია.

"დაახლოებით 5 წლის წინ, ბინას მეპატრონე აგირავებდა თავისი პრობლემიდან გამომდინარე და რამდენიც სჭირდებოდა თანხა, იმდენს აფასებდა. დღეს ასეთი რაღაც შეიძლება კიდეც ხდება, მაგრამ იშვიათად და ჩვენამდეც აღარ აღწევს. იმიტომ, რომ ძალიან მოთხოვნადია გირაო რუსთავში და საკმარისია, ნაცნობთან ან მეზობელთან თქვას ადამიანმა, უკვე გირავდება. სააგენტოში კი ხვდება ისეთი განცხადებები, რომელიც არაადეკვატური ფასების შემცველია. ერთოთახიანი არ უნდა სცდებოდეს 17 000-18 000$-ს. მართალია, ამ ფასშიც გირაოს შოვნა უკვე ძალიან გაგიჭირდებათ, თუმცა შესაძლებელია, რომ გაგიმართლოთ და ხელში მსგავსი ვარიანტი ჩაგივარდეთ", - აცხადებს უძრავი ქონების აგენტი.

ცერცვაძის განცხადებითვე, საცხოვრებლად ვარგისი ერთოთახიანი ბინისთვის დღეს უკვე რუსთავში, ძირითადად, 20-25 000$-მდე მაინც დაგჭირდებათ, ოროთახიანი სახლი კი 25-30 000$-მდე თანხის ფარგლებში შეგიძლიათ იგირაოთ.

უძრავი ქონების აგენტი აღნიშნავს, რომ მაქსიმალური თანხა, რაც გასული პერიოდის განმავლობაში, გირავნობაში გადაუხდიათ ქალაქში, 35 000$ იყო.

"ეს იყო ჩეხური ოთხოთახიანი. ამაზე ძვირად ნამდვილად არ გამიგია, რომ ბინა დაგირავებულიყო", - ამბობს ალექსანდრე ცერცვაძე.