მეორადი ბინა თუ ბინა ახალაშენებულ კორპუსში? - ამ სტატიაში მოგიყვებით, რაზეა უფრო მაღალი მოთხოვნა რუსთავში.

აღნიშნული კითხვით "ინფო რუსთავი" უძრავი ქონების ბაზარზე დასაქმებულ აგენტებს დაუკავშირდა.

როგორც უძრავი ქონებით მოვაჭრეები ამბობენ, ქალაქში ამ ორი კატეგორიის ბინებისადმი მოთხოვნა არ არის ერთმანეთისგან მნიშვნელოვნად განსხვავებული, თუმცა განმარტავენ იმასაც, რომ ჯერ-ჯერობით, მცირედით მაინც აჭარბებს ძველი საცხოვრებელი სახლებით დაინტერესებული მომხმარებლების რიცხვი ახალს.

უძრავი ქონების აგენტი, ალექსანდრე ცერცვაძე ამბობს, რომ ძირითადად, საცხოვრებელი დანიშნულებისთვის ძველ, გასაქირავებლად კი ახალ ბინებს ყიდულობენ.

"დიდი სხვაობა არ არის. დაახლოებით 60% მოთხოვნაა ისევ ძველ ბინებზე, 40% კი ახალაშენებულზე. ახალაშენებული ბინები, ძირითადად, არის ბიზნესის წყარო. რასაც ქვია ყიდვა, გარემონტება და გაქირავება. 90% გაყიდული ბინების ქირავდება.

რაც შეეხება საცხოვრებელ დანიშნულებას, ამ შემთხვევაში უფრო მეტად ირჩევენ ძველ ბინას. სანდოობა და ხარისხი ერთია, მაგრამ ყველაზე მთავარი ისაა, რომ გადაწყვეტილების მიღების პროცესში, როცა საცხოვრებლად სურთ ბინის შეძენა, დიდ როლს თამაშობს სამეზობლო ურთიერთობები და ამიტომაც ანიჭებენ ძველ სახლებს უპირატესობას. რა თქმა უნდა, ძველ ბინებსაც ყუდლობენ გასაქირავებლად, მაგრამ ამ კუთხით, გათვლა უფრო ახლებზეა, რადგან სხვა ვალუტაში ქირავდება ასეთი ფართები", - აცხადებს ალექსანდრე ცერცვაძე.

უძრავი ქონების სააგენტოების წარმომადგენლები ასევე ამბობენ, რომ ხშირად, იდენტური სიდიდის, გარემონტებულ ფართებზე ფასები ძველსა და ახალ ბინებში, ერთმანეთისგან განსხვავდება, ღირებულებებს შორის ეს სხვაობა კი მყიდველისთვის მნიშვნელოვანია, თუმცა აღნიშნავენ იმასაც, რომ არის შემთხვევებ და არცთუისე იშვიათად, როცა მყიდველს სურს თავად გაარემონტოს ბინა, რაც ამ შემთხვევაში, მის არჩევანს ახალაშენებულ კორპუსზე აჩერებს.

აღსანიშნავია, ფასზე "ვაჭრობაც". აგენტების თქმით, ხშირად მყიდველსა და მეპატრონეს შორის ხდება სიტყვიერი შეთანხმება, რაც ფასის დაკლებას იწვევს, სამშენებლო კომპანიებთან კი, მსგავსი შეთანხმების მიღწევა, შედარებით უფრო რთულია.

საინტერესოა, რა გამოცდილება გაქვთ თქვენ და რომელს ანიჭებთ უპირატესობა. გაგვიზიარეთ თქვენი მოსაზრებები კომენტარების ველში.