UFC-ში კიდევ ერთი რუსთაველის, ალექსანდრე თოფურიას დებიუტი წარმატებით შედგა.

ალექსანდრემ სადებიუტო ბრძოლაში ავსტრალიელი კოლბი თიქნესი 3 რაუნდიანი დომინაციით დაამარცხა და გამარჯვება მოიპოვა.

ალექსანდრე ილიას მსგავსად გერმანიაში დაიბადა, თუმცა რამდენიმე წელში ოჯახთან ერთად ძმები საქართველოში დაბრუნდნენ.

ძმები თოფურიები დაწყებით კლასებში ორ დასთან ერთად რუსთავის კერძო სკოლა"ლამპარში", დღევანდელ "მენაფირის აკადემიაში", სწავლობდნენ.

სკოლის დირექტორი, თემურ მენაფირე იხსენებს, რომ ალექსანდრე გამორჩეული, დინჯი და მოწესრიგებული ბავშვი იყო.

ილიას და ალექსანდრეს განსაკუთრებული ძმობა და ერთმანეთის გვერდში დგომა, რასაც მსოფლიო ახლა კარგად ხედავს, ბავშვობიდანვე შესამჩნევი იყო.

"ალექსანდრე ძალიან გამორჩეული ბავშვი იყო, ძალიან დინჯი, მოწესრიგებული და გაწონასწორებული. ილია ცოტა ცელქი, მოჩხუბარი. ერთადერთი თუ რამეს წყობიდან გამოჰყავდა ალექსანდრე ილიას ვინმესთან კამათი თუ მოუწევდა. ილიას რომ რამე საფრთხე ემუქრებოდა, ერთი წლით დიდი იყო და მასზე ზრუნავდა, როგორც ახლა არიან. ეს მოდის ბავშვობიდან, გვერდიგვერდ კლასებში სწავლობდნენ და გაკვეთილები რომ დამთავრდებოდა არ არსებობდა ილიას კლასში არ შესულიყო და მისთვის არ დაეხედა",- გვითხრა თემურ მენაფირემ.

ალექსანდრემ მე-6 კლასიდან სწავლა რუსთავის N21-ე საჯარო სკოლაში გააგრძელა, სადაც მე-9 კლასის ჩათვლით სწავლობდა, შემდეგ კი ილიასთან ერთად ესპანეთში გადავიდა საცხოვრებლად.

ნინო გავაშელი, რომელიც 21-ე სკოლის დირექტორი იყო, ამბობს, რომ ალექსანდრეს და ილიას განსაკუთრებული ძმობა ჰქონდათ და სკოლაში გაკვეთილებს შორის თავისუფალ დროს სულ ერთად ატარებდნენ.

"ჩვენთან რომ გადმოვიდნენ ორივე განსაკუთრებული იყო. იმ დღეს ვიხსენებდით, გერმანულის ოლიმპიადაში განსაკუთრებული წარმატებები ჰქონდათ. ორივე აქტიური იყო, თუმცა სწავლითაც გამოირჩეოდნენ. სულ ერთად იყვნენ, დასვენებაზე ზარი რომ დაირეკებოდა ალექსანდრე ილიასთან მიდიოდა ხოლმე",- იხსენებს ნინო გავაშელი.