2017-12-20 10:54:45
სურსათის ეროვნულმა სააგენტომ ცხენის და ვირის ხორცის უკანონო რეალიზაციის შემთხვევები გამოავლინა.
სააგენტოს ინფორმაციით, ხორცის სახეობრივი კვლევის შედეგად საზოგადოებრივი კვებისა და სარეალიზაციო ობიექტებიდან აღებული 90 ნიმუშიდან 12-ში ცხენის ხორცი, ერთში კი ვირის ხორცი აღმოჩნდა. კვლევა ქვეყნის მასშტაბით 90 ობიექტში, მათ შორის რუსთავის ერთ-ერთ ობიექტშიც, განხორციელდა.
დარღვევები თბილისში, ბათუმში, ონში, ქარელსა და გორში გამოვლინდა. ცხენის ხორცი სხვადასხვა შემთხვევაში ბასტურმაში, ფარშში, ხინკალში, კატლეტში, ქაბაბში, გუფთასა და სხვა დსასახელების პროდუქტებში, ვირის ხორცი კი მზა კერძში, ოსტრში, აღმოჩნდა. გამოვლენილი დარღვევების გამო ბიზნესოპერატორები დაჯარიმდნენ. მათ საეჭვოდ მიჩნეული სურსათის ბაზრიდან გამოთხოვა დაევალათ.
შეგახსენებთ, ცხენის ან ვირის ხორცის რეალიზაციის შემთხვევაში, აუცილებელია კანონმდებლობით გათვალისწინებული მოთხოვნების დაცვა. პირუტყვი უნდა იყოს იდენტიფიცირებული, ჩატარებული ჰქონდეს შესაბამისი ვეტერინარული ღონისძიებები (ვაქცინაცია და ა.შ) და უნდა დაიკლას სასაკლაოზე. სავალდებულოა ხორცი იყოს ეტიკეტირებული და მითითებული იყოს ხორცის სახეობა.
ავტორი: ირმა კურტანიძე
