ბინების დღიურად გაქირავება ბოლო რამდენიმე წელია რუსთავში საკმაოდ მოხოვნადი სერვისი გახდა.

სერვისით მოსარგებლეთა რიცხვი დღითიდღე მატულობს. სახლებს რუსთავში დღიურად როგორც ქართველები, ასევე უცხოელებიც ქირაობენ.

"ინფო რუსთავი" დაინტერესდა, რამდენ ლარშია შესაძლებელი რუსთავში ბინით დღიურად სარგებლობა.

ამ შემთხვევაში, მნიშვნელოვანი დეტალი არაა, ბინა იყოს პრესტიჟულ ადგილას, ძირითადად მოთხოვნა კი ერთოთახიან და ოროთახიან სახლებზე მოდის.

თითქმის ყველა საცხოვრებელი ფართი, რომელსაც შესაბამის პორტალზე შეხვდებით, საკმაოდ მოწესრიგებულია და აღჭურვილია ყველანაირი კომუნიკაციით.

რაც შეეხება ფასებს, ყველაზე იაფად, 40 ლარად შეძლებთ რუსთავში ერთი დღით ბინის დაქირავებას. ბუნებრივია, ღირებულება ცვალებადია და 100 ლარამდეც ადის.

გამონაკლისი არც რუსთავია და სხვა ქალაქების მსგავსად, სახლის დაქირავება შეგიძლიათ საათობრივადაც. მიდგომა გამქირავებლების მხრიდან ინდივიდუალურია, შესაძლოა, საათში 10 ლარადაც შეძლოთ ბინით სარგებლობა, თუმცა, არც ისაა გამორიცხული, აღნიშნულ სერვისში 50 ლარის გადახდაც მოგიწიოთ.