რუსთავის „შშმ პირთა ცენტრში“ შეზღუდული შესაძლებლობის მქონე პირთა უფლებების დაცვის საერთაშორისო დღე აღნიშნეს. ღონისძიების მონაწილეები ამ ცენტრის ბენეფიციარები იყვნენ, რომლებაც სცენაზე ფოლკლორული სიმღერები შეასრულეს. ცენტრის დირექტორი, ნანა ზერეკიძე, ამ დღის მნიშვნელობაზე საუბრისას ამბობს - „ძალიან დიდი მნიშვნელობა აქვს ბავშვებისთვის თითოეული სტუმრის მოსვლას, რადგან ხვდებიან, რომ მიტოვებულები არ არიან და გრძნობენ, რომ საზოგადოების აქტიური წევრები არიან. დიდი ხნის განმავლობაში გაჰყვებათ მათ ემოციები." ღონისძიებას ესწრებოდა რუსთავის მერი ირაკლი ტაბაღუა, მაჟორიტარი დეპუტატი გიორგი ბეგაძე, გუბერნატორის მოადგილე კახა კობერიძე, საკრებულოს თავმჯდომარე ლევან ონიანი, აგრეთვე, ქრისტიანული და მუსლიმური კონფესიის წარმომადგენლები.
ქალაქის მერმა ცენტრის წარმომადენლებს მზაობა გამოუცხადა დახმარებისა და თანამშრომლობისთვის და აღნიშნა - „მინდა, რომ ადაპტაციის უკეთესი პირობები შევთავაზო ამ ცენტრის ბენეფიციარებს, რათა მათ არ მოუხდეთ სხვა ქალაქში წასვლის აუცილებლობა, ასევე, ვეცდები, რომ გადამზადების გზით ხელი შევუწყო პროფესიონალური კადრების ზრდას.“ შეზღუდული შესაძლებლობის მქონე პირთა უფლებების დაცვის საერთაშორისო დღე მიულოცა ბავშვებს მაჟორიტარმა დეპუტატმა გიორგი ბეგაძემ და განაცხადა - „შეზღუდული შესაძლებლობები არ არსებობს, ამაში დღეს კიდევ ერთხელ დავრწმუნდი. დიდი სითბო და ნიჭერება მოდის ამ ახალგაზრდა ადამიანებისგან. ჩვენ ვართ, რომ ხელი შევუწყოთ მათ, რათა გავაორმაგოთ ის მზრუნველობა, რაც მათ ახლა აქვთ.“

ღონისძიებას „შშმ პირთა ცენტრი“ ყოველწლიურად მართავს.