საქართველოში „ასტრაზენეკას“ დაპირებული - 43 200 დოზა ვაქცინა შემოვიდა.

თუმცა ცნობილი გახდა, რომ ავსტრია, ესტონეთი, ლიეტუვა, ლუქსემბურგი და ლატვია “ასტრაზენეკას“ გამოყენებას აჩერებს. ასეთი გადაწყვეტილება მას შემდეგ მიიღეს,  რაც 4 ადამიანს ვაქცინის მიღების შემდეგ სისხლის შედედების საშიში მდგომარეობა დაუდგინდა.

რამდენად სწორია ამ სიტუაციაში „ასტრაზენეკას“ ვაქცინის საქართველოში შემოტანა, ამ თემაზე იმუნოლოგმა ბიძინა კულუმბეგოვმა „ფორტუნას“ გადაცემაში ისაუბრა.

მისი თქმით, ვაქცინაციის დაწყების ყველა დღესა და საათს მნიშვნელობა აქვს, მით უფრო, რომ საქართველო ევროპის რუქაზე იმ ძალიან ცოტა ქვეყანას შორის იყო, სადაც ვაქცინაცია დაწყებული არ იყო.

„ძალიან მნიშვნელოვანი საკითხია და მთელი მსოფლიო ჩართულია ამ ვაქცინაციის პროცესში. მესამე მსოფლიო ომითაც კი იხსენიებენ ამ თემას ვაქცინების მოპოვებასთან დაკავშირებით. რა თქმა უნდა, პანდემიის დამარცხება ეთიოტროპული წამლისა და ვაქცინაციის გარეშე რთულად წარმოსადგენია.

შესაბამისად ვაქცინაცია არის წინა პირობა იმისა, რომ მსოფლიო სრულფასოვან ცხოვრებას სრულად თუ არა ნაწილობრივ მაინც დაუბრუნდეს. გაიხსნას ქვეყნების ეკონომიკა და საზღვრები. მოგვეცეს უსაფრთხო მოგზაურობისა და საქმიანი შეხვედრის შესაძლებლობა.

ყოველთვის ვამბობდით, რომ ვაქცინაციის დაწყების თვითოეულ დღეს და თვითოეულ საათს მნიშვნელობა აქვს. იმიტომ რომ მსოფლიოში 131 ქვეყანაში აქტიურად მიმდინარეობს ვაქცინაციის პროცესი  და 300 მილიონზე მეტი ადამიანი უკვე აცრილია. ჩვენთვის ძალიან გულდასაწყვეტი იყო, რომ ევროპის რუქაზე იყო ძალიან ცოტა ქვეყანაა დარჩენილი, რომელსაც ვაქცინის ერთი დოზაც კი არ ჰქონდა გამოყენებული. ახლა საქართველო შეუერთდება იმ ყვეყნების რიგს, სადაც ვაქცინაცია დაწყებულია“. – ამბობს კულუმბეგოვი „ფორტუნასთან“ საუბარში.

კულუმბეგოვი აღნიშნავს, რომ იმ შემთხვევაშიც კი თუ ქვეყანაში ვაქცინაციის მსურველი ყველა იქნება, შეუძლებელია, ყველას ვაქცინაცია მოხდეს.

„რასაკვირველია, ვაქცინა ყველა მსურველის არსებობის შემთხვევაშიც ყველა მსურველისთვის ვერ იქნება. საყოველთაობა პრაქტიკულად არც ერთ ქვეყანას არ აქვს. ვაქცინა დასაწყისში პრიორიტეტული ჯგუფებისთვისაა ხელმისაწვდომი.  ეს პრიორიტეტული ჯგუფები ყველა ქვეყანაშია განსაზღვრული, რომელიც  თითქმის ყველგან ერთმანეთს ჰგავს.

საქართველოში როგორც ცნობილია ჯერ აიცრებიან მედიკოსები, შემდეგ ასაკოვანი ადამიანები. შემდგომ პრიორიტეტულ ჯგუფებში შემოვა პოლიცია და ჯარი შემდგომ იქნება მოსახლეობის ის სეგმენტი, რომელიც 60-დან 65 წლამდე ასაკის არიან, რომლებსაც ქრონიკული დაავადებები აქვთ.

რა თქმა უნდა, ვაქცინაციის ეფექტი არ იქნება პანდემიის დასრულება. ვირუსმა შეიძლება იმოძრაოს საზოგადოებაში და ეს შეიძლება ერთი წელიც კი გაგრძელდეს. მაგრამ  თუ ჩვენ საავადმყოფოები გვექნება ცარიელი და სიკვდილიანობა იქნება ერთეული, ეს კარგი შედეგი იქნება. რა ვქნათ, ადამიანის ბუნება ასეა მოწყობილი. დაავადებამ შეიძლება,  რომ ადამიანებს რაღაც დაუშაოს. ამიტომ ვაქინაციის საკითხი არის ძალიან მნიშვნელოვანი. ამას კიდევ ერთხელ ხაზგასმით აღვნიშნავ, რომ ძალიან გამიხარდა ვაქცინის შემოტანის ვადის გადმოწევა. რაც უფრო სწრაფად დაიწყება ვაქცინაცია, ეს იქნება წინ გადადგმული ნაბიჯი“. – განმარტავს კულუმბეგოვი.

კულუმბეგოვის თქმით, ვაქცინაციის სანდოობა სხვადასხვა ქვეყანაში სხვადასხვაა.

„ზოგიერთ ქვეყანაში ვაქცინის მიმართ სკეპტიკური დამოკიდებულებაა. ზოგიერთ ქვეყანაში საზოგადოება დიდ სანდოობას უცხადებს ვაქცინაციას. ისრაელი არის სამაგალითო ქვეყანა, სადაც მოსახლეობის დიდმა ნაწილმა უკვე გაიკეთა ვაქცინაციის პირველი დოზა და 40 %-ზე მეტმა გაიკეთა მეორე დოზა. რა თქმა უნდა, ახლა ჩვენ სამუშაო გვაქვს და ადამიანებს უნდა ავუხსნათ და ვუთხრათ, რომ ვაქცინაცია კაცობრიობის მიღწევაა და მიუხედავად იმისა, რომ  დროში ეს ვაქცინები უფრო სწრაფად შეიქმნა, კომპრომისი რაიმე სახის უსაფრთხოების სახით არ ყოფილა. ყველა ეტაპი გაიარა ვაქცინებმა, რასაც ათი წლის განმავლობაშ გადიოდნენ ვაქცინები. უსაფრთხოების საკითხი არავის მიუფუჩეჩებია.

ამ ვაქცინებმა ყველა ეტაპი კარგად და სწორად გაიარეს, რა თქმა უნდა, ყველა ვაქცინა არაა მედიკამენტი და არ არსებობს მედიკამენტი გვერდითი მოვლენის გარეშე.

სულ რაღაც 2 თვის განმავლობაში მსოფლიოში აიცრა 326 მილიონი ადამიანი. ადამიანები უკვდავები ხომ არ ვართ. ვიღაცას რაღაც დაავადებები ბუნებრივად ემართება. აქ  საუბარია, რომ მეთვალყურეობა იყოს ისეთი, რომ აცრასა და აუცრელ ჯგუფებს შორის წინა წლებთან შედარებით სტატისტიკური სხვაობა არ მოგვცეს დაავადებულებმა.

ჯერჯერობით აშშ-ში ჩატარებული 23 მილიონ დოზაზე მოხდა გვერდითი მოვლეების მონიტორინგი და ითქვა, რომ პლაცებო, ანუ რომელიმე დაავადების ხელშესახები გაზრდა, არ ყოფილა. ალერგიული რეაქციები ვაქცინაზე შედარებით უფრო ხშირია, ვიდრე წინა ტრადიციულ ვაქცინებზე ვლინდებოდა ხოლმე, ანუ დაახლოებით 1 მილიონი დოზა ვაქცინიდან  5 ალერგიული მძიმე რეაქცია გამოვლინდა. ადრე იყო მილიონიდან მხოლოდ ერთი.

ეს ჩვეულებრივი პროცესია, შეიძლება არაა კორექტული შედარებაა, მაგრამ წელიწადში მინიმუმ 6-7 ავიაკატასტროფა ხდება, მაგრამ ამის გამო ავიაციის შეწყვეტა არავის გადაუწყვეტია. მესმის, თვითოეული ადამიანის ჯანმრთელობის დაზიანება ძალიან მნიშვნელოვანია. ერთბაშად ერთმა მილიონმა კაცმა „იბუპროფენი“ რომ დალიოს, იქედან დარწმუნებული ვარ, რაღაც პროცენტს სისხლის შედედების პრობლემაც დაემართება და როცა  ერთბაშად ამდენი ადამიანი იკეთებს აცრას, ბუნებრივია იქ  პრობლემებიც გამოუვლინდებათ. ამით იმის თქმა მინდა, რომ გვერდითი მოვლენების გარეშე არაფერი არ არსებობს და პირველ რიგში ამას ჩვენ ვხვდებით, ექიმები“, – განმარტა კულუმბეგოვმა.