რუსთავში არსებული შოთა რუსთაველის სახელობის სკოლა-ლიცეუმს ავტორიზაცია შეუჩერდა. გადაწყვეტილება ამის შესახებ ზოგადსაგანმანათლებლო დაწესებულებების უმაღლესმა საბჭომ 15 მაისს, Zoom-ში გამართულ ონლაინ-სხდომაზე მიიღო.

გადაწყვეტილება მიმდინარე წლის 30 ივნისიდან ამოქმედდება. ანუ ჩაღლარის საგანმანათლებლო დაწესებულებების ქსელში შემავალი სკოლა-ლიცეუმი მიმდინარე სასწავლო წელს დაასრულებს, თუმცა ახალს ვეღარ დაიწყებს.

გადაწყვეტილებას უსამართლოს და ბრალდებებს სრულიად აბსურდულს უწოდებს სკოლა-ლიცეუმის დირექტორი ნანა ყანჩაველი. როგორც სკოლის დირექტორი "ინფო რუსთავთან" საუბარში აღნიშნავს, ის სამართლებრივი ბრძოლის დაწყებას აპირებს.

"გაურკვეველი და სრულიად აბსურდული მიზეზების გამო შეუჩერდა სკოლას ავტორიზაცია. ჩვენთან თებერვალში იყო მონიტორინგის ჯგუფი და 3 დღის მუშაობის შემდეგ დაწერეს დასკვნა, რომელიც ნამდვილად არ შეეფერება სიმართლეს. ჩვენ ამას აუცილებლად გავაპროტესტებთ. კატეგორიულად ვემიჯნებით ყველა ბრალდებას, რომელიც მითითებული იყო დასკვნაში. იმიტომ , რომ სკოლა არის გამართული თავისი ინფრასტრუქტურით, მატერიალურ-ტექნიკური ბაზით, მუშაობის სტილით და მიმართულებით, ეროვნულ-სასწავლო გეგმაზე დაყრდნობით, ყველაფერი არის თანხვედრაში საგანმანათლებლო სისტემასთან. ასე რომ, რაღაც მიზერული, ელემენტარული მიზეზების გამო სკოლის დახურვა არის საოცრად გულგრილი და ზერელე დამოკიდებულება ამ სფეროს მიმართ. ვერ გეტყვით რა არის რეალური მიზეზი, თუ მიზეზი გახდა ის, რომ არ მოეწონათ შესაკეთებელი საკეტი და ასეთი წვრილმანები, ამას ჩვენ აუცილებლად გავარკვევთ.  ვიწყებთ ორშაბათიდან სამართლებრივ დავას და შევეცდებით, რომ კანონიერი გზით მივაღწიოთ შედეგს. სააპელაციო საბჭოში შეგვაქვს განაცხადი", - განაცხადა ნანა ყანჩაველმა.

პირველ ივნისს გადაწყვეტილება უწყების ოფიციალურ გვერდზეც გამოქვეყნდა. დოკუმენტში განმარტებულია დაწესებულებისთვის ლიცენზიის გაუქმების მიზეზები.

15 მაისს გამართული სხდომის ოქმში საუბარია საკითხებზე, რომლებიც სკოლაში მისულმა ექსპერტებმა პრობლემურად შეაფასეს და საბოლოოდ ავტორიზაციის შეჩერების საფუძველი გახდა. ექსპერტთა თქმით:

• ერთ-ერთი ექსპერტის განცხადებით, სწავლისა და განვითარების თანაბარი შესაძლებლობების უზრუნველსაყოფად სკოლას არ ჰქონდა შემუშავებული მოსწავლის სწავლასთან დაკავშირებული სირთულის იდენტიფიცირების მექანიზმები და პირველადი მართვის სტრატეგიები, რითაც დაირღვა ინკლუზიურ განათლებასა და სპეციალური საჭიროების მქონე მოსწავლეთა პრობლემების იდენტიფიკაციის თაობაზე არსებული წესები.
  მშობელს უფლება ჰქონდა, წინასწარი შეთანხმების შემთხვევაში, დასწრებოდა გაკვეთილებს, რითაც დაირღვა სასწავლო გეგმა და პერსონალურ მონაცემთა დაცვის შესახებ კანონი;
• მოსწავლის სტატუსის შეჩერების გადაწყვეტილება დადგენილი წესით არ იყო გაგზავნილი მშობლისთვის/კანონიერი წარმომადგენლისთვის.
• ექპერტის განცხადებით, სკოლის ყველა სართულზე არ იყო მოწყობილი ტუალეტები გოგონებისა და ბიჭებისათვის. სკოლაში არსებულ ყველა ხელსაბანში უზრუნველყოფილი არ იყო ხელის გასამშრალებლისა (ელექტროსაშრობი ან ქაღალდის პირსახოცის დისპენსერი) და ნარჩენების კალათის (უკონტაქტო) ხელმისაწვდომობა. სსმ მოსწავლეებისთვის (როგორც ვაჟი, ისე გოგონა) არ იყო შესაბამისად მოწყობილი სველი წერტილი, არ იყო დაცული სველ წერტილში შესასვლელი მინიმალური ზომები. გამოკრული საევაკუაციო გეგმები არ იყო სახანძრო უსაფრთხოების მოთხოვნებთან შესაბამისობაში და არ იყო მოშლილი კიბის ქვემოთ მოწყობილი სათავსო. ექსპერტის თქმით, დაწესებულებაში არ ხდებოდა სანიტარულ – ჰიგიენური ნორმების დაცვის მონიტორინგი და კონტროლი.

ოქმში მითითებულია სკოლის დირექტორის არგუმენტებიც ექსპერტთა განცხადებების საპასუხოდ. კერძოდ:

• საბჭოს სხდომაზე დირექტორმა, მარეხ ყანჩაველმა, აღნიშნა, რომ რეკომენდაციები სასკოლო სასწავლო გეგმის ხარვეზებთან დაკავშირებით სკოლამ გაითვალისწინა, კერძოდ, დოკუმენტების დანომვრა – აკინძვასა და შესაბამისი ბეჭდით დამოწმების თაობაზე.
• მისი თქმით, საათობრივ ბადესთან დაკავშირებით შემუშავებულ იქნა მოდელი და გადაიგზავნა დასამტკიცებლად საქართველოს განათლების, მეცნიერების, კულტურისა და სპორტის სამინისტროში, თუმცა პასუხი არ მიუღიათ.
• დირექტორმა განმარტა დაწყებითი საფეხურის კლასებში შემაჯამებელი დავალებების შესახებ. მისი თქმით, არ იყო ვალდებულება იმისა, რომ 1-4 კლასის მოსწავლეებს შეესრულებინათ შემაჯამებელი დავალებები ეროვნული სასწავლო გეგმის მიხედვით.
• დირექტორის განმარტებით, სკოლის ადმინისტრაციამ მატერიალურ რესურსთან დაკავშირებული რამდენიმე ხარვეზი გამოასწორა, რაც დაადასტურა ფოტომასალით საბჭოს სხდომაზე.