ბოლო დღეებია 24 ნოემბერს ბათუმში, სასტუმრო "ლეოგრანდში", მომხდარი ტრაგედიის ერთ-ერთ მიზეზად სახანძრო უსაფრთხოების წესების დარღვევა სახელდება.
მაღალი საზოგადოებრივი ინტერესის გათვალისწინებით, "ინფო რუსთავმა" გადაწყვიტა, რუსთავში მაღალართულიან სასტუმროებში არსებული ხანძარსაწინააღმდეგო სისტემისა და უსაფრთხოების ნორმების შესახებ ინფორმაცია მოეძიებინა.
როგორც რუსთავის სასტუმროების წარმომადგენლები აცხადებენ, მათ შენობებში საევაკუაციო კიბეები და ცეცხლჩამქრობი სისტემებია განთავსებული.

"სამი საევაკუაციო კიბე გვაქვს, 2 ფოიეში ჩადის, ერთი კი უკანა გასასვლელით გადის, უსაფრთხოების ზომები დაცულია" - სასტუმრო "რუსთავის" დირექტორი მალხაზ ალბორიშვილი

"არის სახანძრო გასავლელები, ცეცხლ მაქრები, კამერები, მაქსიმალურად დაცულია უსაფრთხოების ნორმები" - სასტუმრო "ავტოპაპას" მენეჯერი ავთანდილ ცირტავა.

"სასტუმრო ყველა სტანდარტს აკმაყოფილებს უსაფრთხოების მხრივ" - სასტუმრო "გრანდ ვეჯინის" მენეჯერი ეკა ლაცაბიძე

რუსთავის მუნიციპალიტეტში აცხადებენ, რომ მერიიის არცერთ სამსახურს სახანძრო უსაფრთხოებასთან დაკავშირებით მონიტორინგის ჩატარების ვალდებულება არ აქვს.

" 2017 წელს ძალაში შევიდა მთავრობის 41- ე დადგენილება "შენობის უსაფრთხოების კოდექსების" სახელწოდებით. ამ კოდექსების დაცვას, მთავრობის 57-ე დადგენილების საფუძველზე, არქიტექტურის სამსახური პროექტის მიღებისას ითხოვს მე-3, მე-4 და მე-5 კლასის შენობებზე (კლასები გულისხმობს შენობის განსაზღვრულ ფართს, მაგ: მე-3 კლასი არის, როცა შენობის ფართი 300 კვ.მ-ზე მეტია) ზედამხედველობის სამსახური მშენებლობის დაწყებისას აკონტროლებს სამშენებლო პროცესი პროექტის მიხედვით მიმდინარეობს თუ არა, მაგრამ ზედამხედველობა ვერ შეამოწმებს და არც ევალება შემოწმება  სახანძრო უსაფრთხოება დაცულია თუ არა. სანამ მშენებლობა დაიწყება, პროექტი სახანძრო უსაფრთხოებაზე უნდა შეთანხმდეს საგანგებო სიტუაციების სამსახურში. მერიის არცერთ სამსახურს სახანძრო უსაფრთხოების წესების შემოწმების ვალდებულება არ აქვს" - აცხადებს რუსთავის მერიის საზოგადოებასთან ურთიერთობის სამსახურის ხელმძღვანელი თამარ აქუბარდია.

შეგახსენებთ, ბათუმში სასტუმრო "ლეოგრანდში" გაჩენილი ხანძრის შედეგად 11 ადამიანი, მათ შორის საქართველოს 10 და ირანის 1 მოქალაქე დაიღუპა. 2015 წელს ქობულეთში, სასტუმრო "არმაზში" გაჩენილ ხანძარს კი სამი რუსთაველი არასრულწლოვანი ემსხვერპლა.