რას გულისხმობს ტექინსპექტირება

ტექინსპექტირების ელემენტები

ტექინსპექტირება, სულ მცირე, ქვემოთ ჩამოთვლილ ელემენტებს უნდა მოიცავდეს:

• სატრანსპორტო საშუალების იდენტიფიკაცი
• სამუხრუჭე აღჭურვილობა
• საჭით მართვის სისტემა
• ხილვადობა
• ფარები, შუქამრეკლები და ელექტრომოწყობილობა
• ღერძები, თვლები, საბურავები და დაკიდება
• შასი და მისი შემადგენლები
• სხვა მოწყობილობები
• უარყოფითი ზემოქმედება (გამონაბოლქვი)

  სად შეგიძლიათ გაიაროთ ტექინსპექტირება

ტექდათვალიერების ცენტრები თბილისში  არაერთ ლოკაციაზე გვხვდება. ადგილმდებარეობიდან გამომდინარე, შეგიძლიათ, თქვენთვის ყველაზე ხელსაყრელი ალტერნატივა შეარჩიოთ და მანქანას ტექინსპექტირება იქ გაატაროთ. 

იმის გათვალისწინებით, რომ საქმე თქვენს უსაფრთხოებას ეხება, სანდო ტექდათვალიერების ცენტრის შერჩევა მეტად მნიშვნელოვანია. დღევანდელი მდგომარეობით მათი უმეტესობა ელექტრონულ სივრცეშიც გთავაზობთ მომსახურებას. შეგიძლიათ, ცენტრებთან დაკავშირებით დამატებით ინფორმაციას სწორედ მათივე საიტებზე გაეცნოთ. გადაწყვეტილების მიღების შემდეგ კი ვიზიტის დაჯავშნა ასევე ონლაინ არის შესაძლებელი.

ტექინსპექტირებისთვის საჭირო დოკუმენტები

ტექდათვალიერების გასავლელად სატრანსპორტო საშუალების მესაკუთრემ უნდა წარადგინოს: 

• სატრანსპორტო საშუალების რეგისტრაციის მოწმობა, ან მისი ასლი
• მომსახურების საფასურის გადახდის დამადასტურებელი საბუთი

  ტექინსპექტირების ტარიფები

ტექინსპექტირების ტარიფები სატრანსპორტო საშუალების ტიპზე არის დამოკიდებული და შეადგენს: პირველადი ინსპექტირებისას 60 ან 100 ლარს, ხოლო განმეორებითი ინსპექტირებისას 20 ან 30 ლარს.

M1 კატეგორიის ავტომობილის (სატრანსპორტო საშუალება, რომელსაც მძღოლის ადგილის გარდა, მაქსიმუმ 8 დასაჯდომი აქვს) ტექინსპექტირების ღირებულება 60 ლარია. ფასი უცვლელია 3 500 კგ-მდე სრული მასის სატვირთოების შემთხვევაშიც. რაც შეეხება მიკროავტობუსებს, ავტობუსებსა და 3 500 კგ-ზე მეტი სრული მასის სატვირთოებს, მათი ტექნიკური დათვალიერება 100 ლარი ჯდება. ვიზიტის დაჯავშნისას დამატებით მოგიწევთ საკომისიოს ღირებულების, 1 ლარის გადახდა. 

ტექინსპექტირების ვადები

• M1 კატეგორიის ავტომობილი ტექდათვალიერებას გამოშვებიდან 4 წლის შემდეგ საჭიროებს. 8 წლამდე პერიოდში მისი ინსპექტირება ყოველ 2 წელიწადში ერთხელ არის აუცილებელი, ხოლო 8 წლის შემდგომ ავტომობილს ყოველწლიურად უნდა გაატაროთ ტექდათვალიერება. 

• M2 და M3 კატეგორიის მიკროავტობუსისა და ავტობუსის შემთხვევაში, ერთი წლის შემდეგ, სატრანსპორტო საშუალება გამოშვებიდან, ხოლო შემდეგ 6 თვეში ერთხელ.

• 3 500 კგ-მდე სრული მასის მქონე სატვირთოებმა ორი წლის შემდეგ  გამოშვების თარიღიდან და შემდეგ ყოველ წელიწადს უნდა გაიარონ ტექნიკური დათვალიერება. 
• 3 500 კგ-ზე მეტი სრული მასის მქონე  სატვირთოებმა ერთი წლის შემდეგ  გამოშვების თარიღიდან და შემდეგ ყოველ წელიწადს

არსებული ვითარებით საიტების უმეტესობა მომხმარებელს სთავაზობს ფუნქციას, რომელიც შემდგომი ტექინსპექტირების თარიღს გაცნობებთ. ეს დაგეხმარებათ ტექინსპექტირება დანიშნულ ვადებში გაიაროთ. 

შეჯამება 

ყველა მძღოლის პასუხისმგებლობაში შედის საკუთარი და გარშემომყოფების უსაფრთხოებაზე ზრუნვა. ტექინსპექტირება ამოწმებს, თუ რამდენად აკმაყოფილებს თქვენი ავტომობილი უსაფრთხოების სტანდარტებს და, შესაბამისად, მისი გავლა სავალდებულოა. 

როგორც ხედავთ, ტექდათვალიერების ცენტრების მომსახურება ხელმისაწვდომი და მარტივია. ასე რომ, თუ თქვენს ავტომობილს ინსპექტირება უწევს, გირჩევთ, ახლავე მიმართოთ შესაბამის ცენტრს, რომელიც მის შემოწმებასა და გამართვაში დაგეხმარებათ. 

არ ავნოთ გარემოს  და დაიცავით უსაფრთხოების ნორმები