რუსული მედია ავრცელებს ინფორმაციას, რომ ვლადიკავკაზში საბაჟოზე დააკავეს რუსეთის მოქალაქე ქალი, რომელიც საქართველოში 2,5 მილიონი რუბლის ღირებულების კვერცხუჯრედებით სინჯარების გადატანას ცდილობდა.

მედია რუსულ ტელეგრამ არხ MASH-ს ეყრდნობა.

36 წლის ქალს ბიოლოგიური მასალა მოჰქონდა ინ ვიტრო განაყოფიერების გასაკეთებლად, თუმცა მას არ ჰქონდა ლიცენზია შესაბამისი ფედერალური სამსახურისგან, რომ ტრანსპორტირება ლეგალური ყოფილიყო.

MASH წერს, რომ ქალს პროცედურა თბილისში, კლინიკა Silk Medical-ში უნდა ჩაეტარებინა. თავად ბრალდებულმა სვეტლანამ მასალა მიიღო პეტერბურგის ერთ-ერთი კლინიკიდან, რათა ის საზღვარზე გადაეტანა, რადგან პროცედურა საქართველოში უფრო იაფი იყო - "სილქ მედიქალში" პროცედურისთვის 6,5 ათასი დოლარი ითხოვეს".

ქალის მტკიცებით, ქართველმა ექიმებმა დაარწმუნეს, რომ მსგავსი ამანათის ტრანსპორტირება კანონიერი იყო, მაგრამ საბუთებთან დაკავშირებით არაფერი უთხრეს.

მას რუსეთში შვიდ წლამდე თავისუფლების აღკვეთა და ერთი მილიონი რუბლის ჯარიმა ემუქრება.