კახეთში მამაკაცმა საკუთარი და მოკლა. კაცმა 35 წლამდე ქალსთავის არეში სასიკვდილო დაზიანება მიაყენა, ის ადგილზე გარდაიცვალა.

შემთხვევა გვიან ღამით, სიღნაღის მუნიციპალიტეტში, საავტომობილო გზაზე მოხდა.

გავრცელებული ინფორმაციით, კონფლიქტის მიზეზი ეჭვიანობა გახდა.

ცნობილია, რომ მამაკაცი ნასვამ მდგომარეობაში იმყოფებოდა. არსებული ინფორმაციით, ფაქტს მათი კიდევ ერთი ძმა შეესწრო.

შინაგან საქმეთა სამინისტრომ სავარაუდო დამნაშავე ცხელ კვალზე დააკავა.

"შინაგან საქმეთა სამინისტროს კახეთის პოლიციის დეპარტამენტის თანამშრომლებმა, ჩატარებული ოპერატიული და საგამოძიებო მოქმედებების შედეგად, 1987 წელს დაბადებული ზ.ა. დააკავეს. მას ბრალად ედება ოჯახის წევრის ჯანმრთელობის განზრახ მძიმე დაზიანება, რამაც სიცოცხლის მოსპობა გამოიწვია.

დანაშაული 10-დან 14 წლამდე თავისუფლების აღკვეთას ითვალისწინებს.

გამოძიებით დადგინდა, რომ ალკოჰოლის ზემოქმედების ქვეშ მყოფმა ბრალდებულმა მამაკაცმა სიღნაღში, ურთიერთშელაპარაკების ნიადაგზე, თავის დას - 1988 წელს დაბადებულ მ.ა.-ს ფიზიკური დაზიანება მიაყენა, რის შედეგადაც ქალი ადგილზე გარდაიცვალა.

სამართალდამცველებმა დანაშაულში ბრალდებული ზ.ა. ცხელ კვალზე დააკავეს.

ოჯახის წევრის მიმართ ჩადენილ ჯანმრთელობის განზრახ მძიმე დაზიანების ფაქტზე გამოძიება საქართველოს სისხლის სამართლის კოდექსის 11 პრიმა-117-ე მუხლის მე-4 ნაწილით მიმდინარეობს", - ნათქვამია უწყების მიერ გავრცელებულ განცხადებაში.