მუნიციპალური განვითარების ფონდმა რუსთავში თავისუფლების მოედნის სატრანსპორტო კვანძის გაუმჯობესების პროექტირების შესყიდვისთვის ბაზრის კვლევა გამოაცხადა.

როგორც თანდართულ დოკუმენტებში ვკითხულობთ, კომპანია, რომელიც საპროექტო-სახარჯთაღრიცხვო დოკუმენტაციას მოამზადებს, უნდა გაითვალისწინოს: 

- არსებული რთული სატრანსპორტო ვითარების (დაბალი გამტარუნარიანობა, მუდმივი შეფერხებები დღის უმეტეს მონაკვეთში) განმუხტვის მიზნით, მოძრაობის ორგანიზების ახალი, მასშტაბური სქემის შემუშავება.

- საგზაო ინფრასტრუქტურის გეომეტრიული პარამეტრების ფუნდამენტური ცვლილება, რაც დასაშვებად მიიჩნევს ახალი გამყოფი კუნძულების მოწყობასა და, საჭიროების შემთხვევაში, შუქნიშნებით რეგულირებადი სისტემის დანერგვას.

- მოძრაობის უსაფრთხოების თანამედროვე სტანდარტების დანერგვა.

- ქვეითთა უსაფრთხო და შეუფერხებელი გადაადგილების უზრუნველყოფა, ასევე საზოგადოებრივი და კერძო სატრანსპორტო საშუალებების ნაკადების ოპტიმიზაცია.

- მოედანზე არსებული ურბანული ინფრასტრუქტურის გადაგეგმარება: „პიაცას“ ტერიტორიის ნაწილის შენარჩუნება და მისი ტექნიკური ადაპტაცია ახალ სატრანსპორტო სქემასთან.

- არაფუნქციონირებადი შადრევნის ტერიტორიის რეორგანიზაცია.

- საპროექტო არეალში არ არის სავალდებულო ველობილიკებისა და საზოგადოებრივი ტრანსპორტისთვის გამოყოფილი ზოლების (Bus Lane) ინტეგრაციის გათვალისწინება.