რუსთავში წლების წინ მომხდარ ფაქტზე პროკურატურამ 1 პირს ბრალდება წარუდგინა. "ინფო რუსთავი:-ს ინფორმაციით საქმე ეხება მრავალსართულიანი სახლის გარშემო დაწყებულ დავას. კორპუსი დაახლოებით 10 წელია რაც აშენდა თუმცა მას მობინადრეები ამ დრომდე არ ჰყავს. სახლი მოდებაძის ქუჩის დასაწყისში, ლეონიძის სკვვერთან დგას, მასში 45 ბინაა, ხოლო პირველ სართულზე განთავსებულია კომერციული ფართები. 

აღნიშნულ საქმეზე დღეს რუსთავის სასამართლოში პირველი სხდომა გაიმართა სადაც ბრალდებულს აღკვეთის ღონისძიების სახით, 10 000 ლარის ოდენობით საპატიმრო გირაო შეეფარდა.

გთავაზობთ განცხადებას რომელსაც პროკურატურა ავრცელებს:

საქართველოს პროკურატურამ თაღლითობის, ყალბი დოკუმენტების დამზადების და გამოყენების ფაქტებზე ერთ პირს ბრალდება წარუდგინა.

შინაგან საქმეთა სამინისტროს მიერ ჩატარებული გამოძიებით დადგენილია, რომ ბრალდებულმა ბინათმშენებლობის ამხანაგობა "რუსთავი 2007"-ის კუთვნილი უძრავი ქონების მართლსაწინააღმდეგო მისაკუთრების მიზნით, დაამზადა და საჯარო რეესტრის ეროვნულ სააგენტოში წარადგინა ყალბი მონაცემების შემცველი ამხანაგობის კრების ოქმები, რომლის საფუძველზეც, უძრავ ქონებაზე უფლებათა რეგისტრაციის განმახორციელებელი ორგანოს მოტყუებით, ბრალდებული თაღლითურად დაეუფლა ამხანაგობის კუთვნილ 1 321 400 ლარად ღირებულ, 641.20 კვ.მ. საცხოვრებელ და კომერციულ ფართებს.

მას ბრალდება საქართველოს სისხლის სამართლის კოდექსის 180-ე მუხლის მესამე ნაწილის "ბ" ქვეპუნქტით (თაღლითობა, ესე იგი მართლსაწინააღმდეგო მისაკუთრების მიზნით სხვისი ნივთის დაუფლება მოტყუებით, ჩადენილი დიდი ოდენობით) და 362-ე მუხლის მეორე ნაწილის „ბ“ ქვეპუნქტით (ყალბი ოფიციალური დოკუმენტის დამზადება და გამოყენება, რამაც მნიშვნელოვანი ზიანი გამოიწვია) წარედგინა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.

პროკურატურამ ბრალდებულისთვის აღკვეთის ღონისძიების შეფარდების შუამდგომლობით, სასამართლოს უკვე მიმართა.

გამოძიება გრძელდება, დანაშაულში შესაძლო მონაწილე სხვა პირების გამოვლენის მიზნით.