რუსთავის საერთაშორისო სკაუტური ცენტრსა და ქვემო ქართლის სკაუტური მოძრაობის ორგანიზაციას შორის 22 წლიანი თანამშრომლობა დასრულდა.

ამის შესახებ ინფორმაცია თავდაპირველად 1 აპრილს რუსთავის საერთაშორისო სკაუტურმა გაავრცელა განცხადება.

"მშობლებო, ბავშვებო და ახალგაზრდებო, გაცნობებთ, რომ რუსთავის საერთაშორისო სკაუტური ცენტრი ღირებულებითი და ფასეულობითი შეუთავსებლობის გამო წყვეტს თანამშრომლობას ქვემო ქართლის სკაუტური მოძრაობის ორგანიზაციასთან. შესაბამისად, ვიხსნით პასუხისმგებლობას მათ მიერ სამომავლოდ განხორციელებული სკაუტური აქტივობების შინაარსზე, ხარისხზე და უსაფრთხოებაზე.

ჩვენი ცენტრი აგრძელებს ახალგაზრდების მხარდაჭერას საერთაშორისო და ადგილობრივი საგანმანათლებლო, კულტურული და სკაუტური პროექტების განხორციელებით.
მუდმივად განახლებად ინფორმაციას დაგეგმილი აქტივობების შესახებ შეგიძლიათ გაეცნოთ ჩვენს ვებ. გვერდსა და სოციალური ქსელების ანგარიშებზე.
გმადლობთ ნდობისთვის და ჩართულობისთვის!".

აღნიშნულ საკითხთან დაკავშირებით ერთი დღის შემდეგ, 2 აპრილს ასევე განცხადება გაავრცელა ქვემო ქართლის სკაუტური მოძრაობის ორგანიზაციამაც.

"გაცნობებთ, რომ რუსთავის საერთაშორისო სკაუტურ ცენტრთან ჩვენი თანამშრომლობა დასრულებულია.

ჩვენი ფუნდამენტური ღირებულება სკაუტური ფასეულობების პატივისცემა და პოპულარიზაციაა - ქვემო ქართლში ახალგაზრდებისთვის თავისუფალი, განვითარებაზე ორიენტირებული და მხოლოდ და მხოლოდ მოხალისეობრივი სულისკვეთებით სავსე სივრცის შექმნა.

ქქსმო ყველა ახალგაზრდისათვის უნდა იყოს ხელმისაწვდომი. ჩვენთვის ანაზღაურება არამატერიალურია და მოიცავს გამოცდილებას, ცოდნას, ახალ მეგობრებს და დაუვიწყარ მოგონებებს.

ამ ღირებულებებით ვაგრძელებთ მუშაობას - ბოლო წლების განმავლობაში ქქსმო უპრეცენდენტოდ მზარდი და პოპულარულია. განვითარების გზაზე კი საჭიროა მეტი რესურსი და მეტი მონდომება.

ქქსმო იხსნის პასუხიმგებლობას ISCR-ში ჩატარებული აქტივობების შინაარსზე, ხარისხსა და უსაფრთხოებაზე, რაც აქამდე მეტწილად ჩვენი ლიდერების პრეროგატივა იყო.
უღრმესი მადლობა რუსთავის საერთაშორისო სკაუტურ ცენტრს მრავალწლიანი პარტნიორობისა და მხარდაჭერისთვის. ჩვენ ამას არ დავივიწყებთ და ყოველთვის დავაფასებთ!
მთელი გულით",- ნათქვამია განცხადებაში.

საინფორმაციო სააგენტო "ინფო რუსთავი" დაინტერესდა უფრო კონკრეტულად რა გახდა ორგანიზაციებს შორის ამდენწლიანი თანამშრომლობის დასრულების მიზეზი, თუმცა დეტალებზე საუბარი არცერთმა მხარემ არ ისურვა.