2024-03-20 12:06:52
სილქნეტი მომხმარებელთა მონაცემების შესაძლო გაჟონვაზე განცხადებას ავრცელებს.
როგორც კომპანია აცხადებს, საუბარია სავარაუდოდ, 2000 მომხმარებლის მაიდენტიფიცირებელ მონაცემებზე.
"კომპანია სილქნეტში მომხმარებელთა მცირე ჯგუფის (სავარაუდოდ 2000-მდე) პიროვნების მაიდენტიფიცირებელი მონაცემების უნებართვო წვდომისა და გამჟღავნების შესაძლო ფაქტთან დაკავშირებით, კომპიუტერულ ინციდენტზე რეაგირების ღონისძიებები მიმდინარეობს.
კომპანია სრული პასუხისმგებლობით აცხადებს, რომ არ მომხდარა აბონენტთა ზარების, ტექსტური შეტყობინებებისა და სხვა ტელეკომ სერვისების ინფორმაციის კანონსაწინააღმდეგო გავრცელება. აქვე ხაზგასმით აღვნიშნავთ, რომ პერსონალური მონაცემების დაცვა, გამჭვირვალობა და ანგარიშვალდებულება კომპანიის ფუნდამენტური საკითხებია“, – ნათქვამია სილქნეტის განცხადებაში.
სილქნეტის განცხადებით, სავარაუდო კომპიუტერული ინციდენტის ფაქტთან დაკავშირებით კომპანია მჭიდროდ თანამშრომლობს სახელმწიფო უსაფრთხოების სამსახურის ოპერატიულ-ტექნიკურ სააგენტოსთან, როგორც კიბერუსაფრთხოების რეგულატორთან, “ინფორმაციული უსაფრთხოების შესახებ” საქართველოს კანონის შესაბამისად, და მასთან ერთად ახორციელებს მოცემული ინციდენტის აღკვეთის, კვლევისა და სამომავლო პრევენციისათვის საჭირო ღონისძიებებს.
"უახლოეს პერიოდში, ინციდენტის კვლევის შედეგებზე დაყრდნობით, გადაწყდება შემდგომი სამართლებრივი რეაგირების საკითხებიც. თემის მნიშვნელოვნებიდან გამომდინარე, კომპანია სილქნეტი პირველი შესაძლებლობისთანავე ეტაპობრივად გაასაჯაროებს აღნიშნულ ინციდენტთან დაკავშირებულ ყველა საჭირო ინფორმაციას იმ მოცულობით, რომ საფრთხე არ შეექმნას მიმდინარე კიბერუსაფრთხოების უზრუნველმყოფი ღონისძიებების ეფექტიანობასა და შემდგომი გამოძიების ინტერესებს“, – ნათქვამია სილქნეტის განცხადებაში.
ამასთან, სილქნეტის აბონენტების პირადი ინფორმაციის შესაძლო გავრცელების საკითხის შესწავლა პერსონალურ მონაცემთა დაცვის სამსახურმა დაიწყო.
როგორც უწყებაში “ნეტგაზეთს” განუმარტეს, საკითხს ორი სხვადასხვა მიმართულებით შეისწავლიან: ერთი ეხება მონაცემთა უსაფრთხოების ზომების დაცვას, ხოლო მეორე – ინციდენტის შეტყობინების ვალდებულებას.
სილქნეტის აბონენტების პირადი მონაცემების შესაძლო გავრცელების საკითხის პერსონალურ მონაცემთა დაცვის სამსახური შეისწავლის.
