15 იანვრის ჩათვლით ქვეყანაში უქმე დღეებია გამოცხადებული, არ მუშაობს რიგი საჯარო და კერძო დაწესებულებები.

მთავრობის მიერ წარდგენილი 2 თვიანი გეგმის მიხედვით, მკაცრი აკრძალვების ნაწილი 16 იანვარს უნდა მოიხსნას. გეგმის მიხედვით, ქვეყნის მასშტაბით:

აღდგება მუნიციპალური და საქალაქთაშორისო ტრანსპორტის მუშაობა, სავაჭრო ობიექტების, ღია და დახურული ბაზრობების მუშაობა (გარდა შაბათ -კვირისა);

შაბათ-კვირაობით ტრანსპორტი, სავაჭრო ობიექტები და ბაზრობები ისევ შეაჩერებენ მუშაობას;

მთელი ამ პერიოდის განმავლობაში შეზღუდვები არ ეხება: ყველა სხვა ეკონომიკურ საქმიანობას, მათ შორის:

სახელმწიფო და კერძო სამშენებლო-სარემონტო საქმიანობას;

საბანკო და საფინანსო საქმიანობას;

სურსათის, ცხოველების საკვების, აფთიაქების, ვეტაფთიაქის, საყოფაცხოვრებო ქიმიისა და ჰიგიენის მაღაზიების და პრესის ჯიხურების მუშაობას;

დელივერსა და გატანის სერვისებს;

სილამაზის სალონებისა და ესთეტიკური მედიცინის ცენტრების მუშაობას;

ავტოტექმომსახურებისა და ტექნიკური ინსპექტირების სერვისებს;

საყოფაცხოვრებო ტექნიკის სარემონტო სერვისებს;

აგრარული ბაზრობის მუშაობას;

არ იზღუდება მსუბუქი ავტომობილით (მათ შორის – ტაქსით) გადაადგილება.

თუმცა, განვითარდება თუ არა მოვლენები გეგმის მიხედვით, ჯერჯერობით უცნობია.

დაავადებათა კონტროლის ეროვნული ცენტრის ხელმძღვანელის მოადგილის განცხადებით, ამ ეტაპზე 16 იანვრის შემდეგ შეზღუდვების გახანგრძლივების საკითხი არ განიხილება. პაატა იმნაძის თქმით, დააკვირდებიან, ახალი წლის დღეებში გაზრდილი მობილობა ეპიდემიოლოგიურ ვითარებაზე როგორ აისახება. უწყებათაშორისი საკოორდინაციო საბჭოს მიერ 26 ნოემბერს მიღებული გადაწყვეტილების შესაბამისად, ქვეყანაში გამკაცრებული ძირითადი შეზღუდვები 16 იანვრამდეა ძალაში.