რუსთავში, განსაკუთრებით ღამის საათებში, ცენტრალურ ქუჩებზე ავტომობილებით ე.წ. დრიფტაობა მოსახლეობის ნაწილისთვის პრობლემად რჩება.

კოსტავას, მეგობრობისა და შარტავას გამზირებზე ღამის საათებში ხშირად შეხვდებით ავტომობილებს, რომლებიც დრიფტაობენ. მოსახლეობამ საინფორმაციო სააგენტო "ინფო რუსთავს" არაერთხელ მიაწოდა ფაქტის ამსახველი ვიდეო მასალაც.

ზაფხულში შინაგან საქმეთა სამინისტრომ მძღოლებისთვის გზაზე მოძრაობის წესები გაამკაცრა, მათ შორის ე.წ. დრიფტისთვის ადმინისტრაციული პასუხისმგებლობა დაეკისრა ყველა სახის სატრანსპორტო საშუალების მძღოლს.

კანონის მიხედვით, ე.წ. დრიფტისთვის სატრანსპორტო საშუალების განზრახ მოცურება/მოსრიალება ან მოცურებით წრიული ბრუნვის განხორციელება (დრიფტი), გარდა კანონმდებლობით დადგენილი წესით ჩატარებულ პროფესიულ სპორტულ ღონისძიებაში მონაწილეობის შემთხვევის, გამოიწვევს დაჯარიმებას 300 ლარის ოდენობით.