რუსთავის მეტალურგიული საწარმოს რამდენიმე ასეული თანამშრომელი მე-13 დღეა გაფიცვას აგრძელებს.

როგორც მშრომელებმა "ინფო რუსთავს" განუცხადეს, მათსა და საწარმოს ადმინისტრაციას შორის გარკვეული სახის კომუნიკაცია მიმდინარეობს, თუმცა შეთანხმების მიღწევა ვერ ხერხდება.

"არის კომუნიკაცია ხელმძღვანელობასთან, თუმცა იგივე ტექსტებს გვიმეორებენ. შეგვპირდნენ მიზერულ ანაზღაურებას, რომ 200 ლარი გადანაწილდება 4 თვეზე, დაიბეგრება და გამოგვდის ყოველთვიური მატება 40-40 ლარი. რა თქმა უნდა, ჩვენ ამისი კატეგორიული წინააღმდეგი ვართ. 2 საწარმოს ხალხი, 400-მდე მუშაა გაფიცული მე-13 დღეა და შედეგი არ არის.

10 კაცს მოუვიდა ხელფასი და უკანონო განთავისუფლების შესახებაც მიუწერეს შეტყობინების ტექსტზე, ჩვენ გვინდა პირობა მათგან, რომ ამ 10 კაცს დავაბრუნებთ. 30 კაცს, ვისაც გვიჩივიან, რომ ვითომ ღუმელი გავაჩერეთ, ამაზე საჩივარი უკან გამოვა. გაცდენილი დღეები, რაც აქ ვიდექით 13 დღე, ჩვენი კუთვნილი შვებულების ხარჯზე აგვინაზღაურდება და ის 160 ლარი არ შეიცვლება ეტაპობრივად 40-40 ლარით, რაც ძალიან მიზერულია ფოლადსადნობში მომუშავე ადამიანისთვის, დღევანდელ პირობებში მით უმეტეს. პირველ ეტაპზე ვითხოვთ მატებას ხელფასის 200 ლარით, შემდეგ კი აგვისტოში კიდევ 100 ლარით", - აცხადებს ერთ-ერთი დასაქმებული.

"ინფო რუსთავი" საკითხთან დაკავშირებით კითხვებით საწარმოს ადმინისტრაციას დაუკავშირდა. ადმინისტრაციაში ამ ეტაპზე კომენტარი არ გააკეთეს.